L-għadab u l-firda bejn il-fazzjonijiet ewlenin fil-Partit Nazzjonalista komplew jidhru biċ-ċar wara l-elezzjoni tal-eżekuttiv tal-Partit Nazzjonalista, li saret is-Sibt; elezzjoni li fiha terz tal-kunsillieri Nazzjonalisti ma vvutawx għal dan l-ogħla organu tal-partit.
Screenshots li waslu b’mod esklussiv għand ONE News, ta’ grupp ta’ partitarji Nazzjonalisti, juri l-għadab li hemm fil-Partit Nazzjonalista.
Xi ħadd kiteb dwar it-turnout baxx li kien hemm fl-elezzjoni għal dan l-organu importanti ħdan il-Partit ta’ Bernard Grech. Partitarju Nazzjonalista kiteb, “68 fil-mija – u l-oħrajn?”
Terz tal-kunsillieri tal-Partit Nazzjonalista ma vvutawx f’din l-elezzjoni u dan wara li saru biss nofs l-elezzjonijiet.
Ħaddieħor qal li tlettax-il xahar ilu kien il-mument opportun ta’ għaqda.
Dan b’referenza għal meta Bernard Grech tellaq waħdu fl-elezzjoni għall-Kap, f’Mejju tas-sena l-oħra.
Ta’ Grech għamlu minn kollox biex, wara l-akbar telfa elettorali li ġarrab il-Partit Nazzjonalista fl-istorja, hu jibqa’ jmexxi l-partit.
F’dan il-grupp xi ħadd staqsa jekk kienx hemm aħbar dwar min tela’ f’din l-elezzjoni. Hawnhekk ikkumentat Elizabeth Said Curmi, li hija viċin l-eks Kap Nazzjonalista Adrian Delia. Hija qalet li huwa ovvju li hi ma telgħetx.
Dan seħħ għax, għal din l-elezzjoni, kien hemm block vote ċar biex nies li m’humiex tal-establishment jibqgħu barra mill-eżekuttiv.
Dan it-tentattiv mill-establishment Nazzjonalista rnexxa, għax primarjament dawk li huma qrib l-eks Kap Nazzjonalista Adrian Delia spiċċaw barra mill-eżekuttiv. Fost dawn kien hemm l-istess Said Curmi, Alan Said, u Mary Cachia.
Tal-establishment lil Delia ma jridux iċedulu pulzier fl-istrutturi tal-Partit Nazzjonalista, għax jibżgħu li jerġa’ jieħu ċerta saħħa.
Partitarja Nazzjonalista oħra qalet li t-tmexxija ta’ Bernard Grech falliet. Qalet li kienet tistenna li t-tmexxija tirrizenja, iżda minflok imorru jippuppaw sidirhom u jkomplu jfarrku lill-Partit Nazzjonalista. L-istess partitarja staqsiet kif jekk lanqas huma kapaċi jmexxu partit, aħseb u ara kif iridu jmexxu pajjiż.
Ieħor qal li fil-Partit Nazzjonalista hemm apatija kbira: bla ħeġġa, ħtieġa u ħajra.
Partitarju ieħor fakkar lit-tmexxija Nazzjonalista li 32 fil-mija tal-kunsillieri, li huma l-hard core tal-partit, ma vvutawx. Qal li dawk li ma vvutawx juru biċ-ċar li mhux komdi u ma jridux lit-tmexxija li hemm bħalissa.
F’din l-elezzjoni tal-eżekuttiv tal-Partit Nazzjonalista ġew eletti dawk viċin l-establishment, fosthom l-eks Ministru tat-tmeninijiet Francis Zammit Dimech, u ħu Beppe Fenech Adami, Michael Fenech Adami. Dan tal-aħħar huwa assoċjat mal-attivitajiet tal-għaqda Repubblika.
Dan filwaqt li telgħu wkoll is-Segretarju Ġenerali Michael Piccinino u anki Michela Dalli, li hija l-assistenta personali ta’ mart il-Kap Nazzjonalista.
