Il-Kummissjoni Ewropea ħabbret pakkett ta’ għajnuna ta’ mitejn miljun ewro għal dawk l-Ukreni li spiċċaw mingħajr dar.
Dan tħabbar mill-President tal-Kummissjoni Ewropea, Ursula von der Leyen, waqt konferenza li saret il-Ħamis fil-kapitali Pollakka, Varsavja. Din il-konferenza ġiet organizzata mill-gvern Pollakk u minn dak Żvediż.
Il-President tal-Kummissjoni Ewropea qalet li l-Ewropa hija magħquda mal-Ukreni fil-ġlieda għall-ħelsien tagħhom. Irrimarkat li l-gwerra issa ilha għaxar ġimgħat għaddejja, u li f’dan il-perjodu l-Unjoni Ewropea kienet ta’ appoġġ għall-Ukrajna.
Fl-Ukrajna hemm qrib it-tmien miljun persuna, li żewġ terzi minnhom huma tfal, li telqu minn djarhom minħabba l-gwerra. Barra minn hekk, iżjed minn ħames miljun persuna telqu mill-Ukrajna lejn il-pajjiżi tal-Unjoni Ewropea.
Intant, stħarriġ tal-Ewrobarometru wera kif il-maġġoranza tal-popli Ewropej jaħsbu li, minn minndu bdiet il-gwerra, l-Unjoni Ewropea wriet solidarjetà u kienet magħquda.
Dan l-istħarriġ sar ix-xahar li għadda u fih ħadu sehem iżjed minn sitta u għoxrin elf persuna mill-Unjoni Ewropea.
F’dan l-istħarriġ ħareġ kif disgħa minn kull għaxra huma favur l-appoġġ umanitarju li qed tagħti l-Unjoni Ewropea lill-Ukrajna.
Kważi tmenin fil-mija tal-Ewropej huma favur is-sanzjonijiet li qed tagħmel l-Unjoni Ewropea kontra l-oligarki Russi.
Minn dan l-istħarriġ ħareġ ukoll kif, żewġ terzi tal-Ewropej, huma favur li l-Unjoni Ewropea tiffinanzja t-tagħmir militari lejn l-Ukrajna.
