Qed isir ippjanar sabiex is-servizzi tas-saħħa f’pajjiżna ikollhom biżżejjed ħaddiema f’dan iż-żmien tant meħtieġ minħabba l-Coronavirus. Hekk stqarr id-Deputat Prim Ministru u Ministru għas-Saħħa Chris Fearne waqt dibattitu fil-Parlament dwar l-imxija tal-Coronavirus f’pajjiżna.
Huwa stqarr li saru kwartieri apposta fejn il-ħaddiema tal-qasam tas-saħħa joqgħodu, flok imorru lura d-dar, filwaqt li qed tkun studjata l-possibilità li jkunu estiżi s-servizzi taċ-childcare għal ħaddiema oħra essenzjali.
Il-Ministru għas-Saħħa Fearne: “Nagħmlu l-almu tagħna biex il-mediċini kollha jibqgħu jaslu ġo pajjiżna. Il-waste management u l-cleansing, it-trasport, dawn huma kollha servizzi essenzjali illi aħna f’dawn il-ġimgħat dħalna fihom waħda waħda, biex naraw li anke meta l-epidemija tkun fl-eqqel tagħha ikollna biżżejjed ħaddiema b’saħħithom u li m’humiex ġo kwarantina illi jistgħu iżommu dawn is-servizzi għaddejjin.”
Waqt id-dibatitu, is-Segretarju Parlamentari għall-Anzjanità Attiva u l-Persuni b’Diżabilità Silvio Parnis qal li parti mir-residenza ta’ San Vincenz de Paul ukoll qed tkun attrezzata sabiex jekk il-virus jidħol f’dan l-isptar ikunu jistgħu jiġu kkurati l-anzjani milquta f’dawn is-swali apposta.
Qal ukoll li tbattlet dar tal-anzjani għal li jista’ jinqala’.
Is-Segretarju Parlamentari Parnis sostna: “Id-dar tal-anzjani tal-Imsida tiġi mbattla. Kellimna lill-familjari tagħhom biex f’każ ta’ emerġenza li fil-homes tagħna jkollna, jkollna anzjani, j’alla ma jkollniex imma li jkunu infettati bil-virus tal-coronavirus, inkunu nistgħu inpoġġuhom f’din il-home.”
Fil-Parlament, il-Ministru għall-Finanzi Edward Scicluna ħabbar li ser ikun imħabbar pakkett apposta li jindirizza l-isfidi kollha f’dawn iċ-ċirkostanzi.
Miegħu ngħaqad il-Ministru għall-Ekonomija, Silvio Schembri li stqarr li hija prijorità li l-Gvern iħares l-impjiegi tal-Maltin u l-Għawdxin.
Min-naħa tiegħu, is-Segretarju Parlamentari Deo Debattista saħaq fuq l-importanza li kulħadd isegwi d-direttivi tal-awtoritajiet tas-saħħa.
