Wara 66 sena li suppost wasal għall-ewwel darba f’Londra, Paddington Bear ingħata passaport Ingliż iżda mhux se jkun jista’ jivjaġġa bih.
Il-produtturi tat-tielet film fis-serje talbu replika ta’ passaport għall-ors li suppost oriġina mill-Peru sabiex jintuża fil-ġbid tal-film Paddington in Peru li mistenni jkun fiċ-ċinema x-xahar d-dieħel, iżda minflok ingħataw passaport uffiċjali. Madankollu dan huwa biss kampjun u għalhekk fil-verità ma jistax jintuża.
Paddington kien inħoloq fl-1958 minn Michael Bond li kien ispirat mill-memorji li kellu tat-tfal evakwati minn Londra b’tabella ma’ għonqhom u kull ma jippossedu f’bagalja. L-ors tant maħbub kien refuġjat mill-Peru li daħal klandestinament fuq vapur mill-Amerika t’Isfel u wasal fl-istazzjon ta’ Paddington b’tabella m’għonqu u bagalja f’idu. Hemm instab mill-familja Brown li tawh l-isem tal-istazzjon.
