- REAZZJONI TAJBA GĦALL-BIDLA FIR-REGOLI TAL-UNIVERSITÀ
“Din hija aħbar tajba immens. Issa jien nista’ nistudja dak li rrid mingħajr ma jkolli għalfejn insiefer barra minn pajjizi. Issa tneħħa ostaklu ieħor u l-opportunitajiet għal dawk li għandhom xi kundizzjoni u jridu jkomplu jistudjaw, żdiedu.”
Dan huwa kliem Emily Slater, tfajla ta’ 18-il sena li għandha l-awtiżmu u minkejja li akkademikament dejjem kisbet riżultati tajbin, sabet il-bieb magħluq biex tkompli tistudja u tidħol l-Università. Dan minħabba regoli tal-Università li kienu qed jagħmluha “impossibbli” li studenti bl-awtiżmu u li għandhom diffikultajiet oħra ta’ tagħlim ikomplu jistudjaw f’din l-istituzzjoni akkademika. Saħansitra Emily marret fil-Parlament Ewropew biex tagħmel l-argument tagħha.
Iżda l-għajta ta’ Emily u bosta persuni oħra ma waqgħetx fuq widnejn torox. Dan hekk kif studenti bl-awtiżmu u studenti oħra li għandhom diffikultajiet oħra ta’ tagħlim se tinfetħilhom opportunità biex jidħlu l-Università. Dan għax l-Università bidlet regolament biex issa trid tikkunsidra d-diffikultajiet fit-tagħlim li wieħed jista’ jkollu. Naturalment, dan ma jfissirx li l-Università se twaqqa l-livelli, u jekk se tistudja l-Ingliż trid tkun ġibt il-kwalifika relattiva f’livell ordinarju u avvanzat. Però wieħed m’għandux jintalab kwalifika li m’għandha x’taqsam xejn u li forsi ma tkunx inkisbet riżultat ta’ xi kundizzjoni jew oħra. M’hemmx regola waħda. Hemm bidla fil-prinċipju li se tiftaħ il-bieb lill-Università tiddeċiedi każ b’każ.
Emily saħqet mal-gazzetta Kullħadd li studenti bl-awtiżmu għandhom ħafna x’joffru u b’din il-bidla issa se jkollhom iċ-ċans li jiżviluppaw il-ħiliet tagħhom. Hija kellha kliem ta’ ringrazzjament għal dawk kollha li għenu biex dik li kienet ħolma issa nbidlet f’realtà. “Issa għandna raġuni oħra biex nemmnu fil-futur tagħna.”
Fost oħrajn, studenti bl-awtiżmu jsibu s-suġġett tal-Malti diffiċli u għalhekk meta bdew jiġu biex jidħlu l-Università bdew isibu bieb magħluq. L-argument li dejjem poġġew fuq quddiem dawk li ħadmu favur università aktar aċċessibbli kien li studenti li riżultat tal-kundizzjoni tagħhom kienu jsibuha diffiċli biex jgħaddu minn suġġetti partikolari tas-SEC, magħrufin bħala o’levels ma jkunux jistgħu jsegwu kors universitarju.
Fil-fatt, studenti b’awtiżmu kellhom biss l-għazla li jkomplu jistudjaw barra minn xtutna fejn jingħataw iċ-ċans li jsegwu korsijiet universitarji hekk kif ir-rekwiżiti kienu adegwati għal persuna bl-awtiżmu.
Għalkemm il-Ministeru tal-Edukazzjoni ilu għal dawn l-aħħar ftit snin jargumenta li hu favur din il-bidla, l-Università li hija awtonoma, dejjem irreżistiet. Però jidher li t-tmexxija l-ġdida fehmet dawn il-ħtiġijiet u għalhekk imbuttat ’il quddiem klawsola ġdida fir-regoli tal-Università li se tibda tgħodd minn Ottubru ta’ din is-sena.
Il-Kummissjoni għad-Drittijiet ta’ Persuni b’Diżabilità (CRPD) ukoll esprimiet is-sodisfazzjon tagħha dwar il-mod kif ipproċediet l-Università ta’ Malta. Għamlet ukoll referenza għall-kritika li proprju kienet għamlet lill-Università Emily Slater, li kienet tkellmet f’seduta tal-Euroscola fil-Parlament ġewwa Strasburgu. Is-CRPD awgurat li din id-deċiżjoni tħalli warajha ħafna opportunitajiet li għad iwasslu biex pajjiżna jkollu aktar persuni b’potenzjal differenti jimirħu fl-oqsma li jixtiequ. Ħeġġet ukoll biex istituzzjonijiet oħrajn jimxu fuq il-passi tal-Università ta’ Malta.
L-Autism Parents Association (AAA) ukoll laqgħet din l-aħbar, il-President tal-Assoċjazzjoni Omar Farrugia, stqarr li din il-bidla se tkun qed twassal biex studenti bl-awtiżmu u studenti oħra li għandhom xi forma ta’ diżabilità issa se jkunu jistgħu jilħqu l-potenzjal tagħhom u jkunu jistgħu jiggradwaw.
“Minn Ottubru, dawn l-istudenti se jiġu mħeġġa li jwettqu l-ħolma akkademika tagħhom mingħajr ebda ostaklu. L-Assoċjazzjoni tirringrazzja lis-senat tal-Università ta’ Malta li se jkun qed iservi ta’ eżempju għal aktar inklussività.”
Min-naħa tagħha Valerie Brincat, omm ta’ tlett itfal bl-awtiżmu stqarret li din l-aħbar għamlitha kuntenta ħafna. Saħqet li t-talent ta’ dawn l-istudenti m’għandux jintilef u li tinsab pożittiva li dan it-tibdil se jkun qed iħalli l-frott. “Persuni bl-awtizmu għandhom potenzjal kbir. Nirringrazzja lill-Università ta’ Malta għal Università aktar aċċessibbli u lil dawk l-individwi li ħadmu biex noffru futur aħjar għal uliedna.”
Mhux biżżejjed
Iżda l-għajta ta’ ġenituri bi tfal dyslexic se tkompli. Doreen Mizzi, omm ta’ żagħżugħ li huwa dyslexic stqarret li minkejja li din hija aħbar pożittiva għal persuni bl-awtiżmu u oħrajn li għandhom diffikultajiet differenti ta’ tagħlim, jeħtieġ li jsir tibdil ukoll għal studenti dyslexic.
Hawnhekk, hija talbet biex isiru pjanijiet mill-MATSEC, dipartiment tal-Università ta’ Malta, biex jinbidlu dawk li huma msejħa bħala access arrangements. Dan ifisser li dawn l-istudenti jeħtieġ li jingħataw l-għajnuna meħtieġa mhux meta jinfetħu l-applikazzjonijiet biex jidħlu l-Università iżda meta jkunu se jpoġġu għall-ezamijiet.
Spjegat mal-gazzetta Kullħadd li dawn l-istudenti fost oħrajn ikollhom bżonn ħin miżjud biex ilestu l-eżami u s-sistema preżenti mhux qed tirrifletti l-bżonnijiet ta’ student dyslexic għax dan il-ħin mhux dejjem jingħata. Appellat lill-Università ta’ Malta biex isir ukoll tibdil għal dawn l-istudenti, biex verament l-Università tkun aċċessibbli għal kulħadd.
