Agostino Borg ġie Ordnat ineħħi 12-il kelb u 25 qattus minn daru. Il-kawża l-Qorti nfetħet minn 11-il ġar li qalu li dan il-ġar ma ħallilhom ebda għażla ħlief li jirrikorru għall-assistenza tal-awtoritajiet. Kien fi Frar 2015, li dawn il-ġirien fetħu kawża l-Qorti u xehdu li sfaw vittmi ta’ rwejjaħ u ħsejjes f’kull siegħa tal-ġurnata kawża tal-annimali li għandu fid-dar Borg. Fl-awla tal-Qorti ntqal li r-raġel sa mill-4.30 ta’ filgħodu jkun diġà ħareġ boroż taż-żibel li minnhom joħroġ likwidu li jħammeġ it-triq. Qalu ukoll li meta jgħaddu minn quddiem id-dar ikunu suġġetti għal tgħajjir, dagħha u insulti fost oħrajn.
Wara din ix-xhied saret spezzjoni fid-dar ta’ Borg fil-Marsa mid-Dipartiment tal-Ħarsien tal-annimali u minn veterinarji u rriżulta li l-klieb u l-qtates kienu jinsabu f’kundizzjoni tajba u nodfa, iżda qalu li d-daqs tal-post li fih kienu qed jinżammu ma kienx wieħed adegwat.
Ir-rapport tal-veterinarju kkonkluda li Agostino kien qed jagħmel att ta’ karità ma’ dawn l-annimali u li kieku ma kienx għalih kienu jispiċċaw bla saqaf fuq rashom. Il-ġirien għamlu numru ta’ lmenti dwar dawn l-annimali iżda qatt ma qalu li kienu qed jinżammu fi stat ħażin.
F’din il-kawża, l-Qorti kienet sabet lir-raġel ħati li kiser il-mistrieħ tan-nies matul il-lejl, li rema u ħalla żibel relatat mal-annimali f’post pubbliku u li ta fastidju lill-ġirien. Il-Qorti ddeċidiet li r-raġel jiġi liberat bil-kundizzjoni li ma jwettaqx reat ieħor fi żmien sentejn u ġie ordnat ineħħu l-annimali minn fejn kienu qed jinżammu u tinstab alternattiva adegwata fi żmien xahrejn. Deċiżjoni li għaliha Borg appella minħabba d-deċiżjoni tal-Qorti li kellu jneħħi lil dawn l-annimali mir-residenza tiegħu. Iżda l-Qorti tal-Appell qablet mad-deċiżjoni tal-ewwel Qorti u għalhekk is-sentenza ġiet konfermata.
