F’dan tmiem il-ġimgħa, il-Fakultà tal-Inġinerija fl-Università ta’ Malta organizzat żewġ open days għall-pubbliku fejn l-istudenti li jinsabu fl-aħħar stadji tal-lawrja tagħhom tal-inġinerija urew il-proġetti finali tagħhom.
Fir-raba’ sena tagħhom, l-istudenti tal-inġinerija huma meħtieġa jaħdmu fuq teżi prattika, biex juru dak li tgħallmu matul il-kors, u mbagħad jippreżentaw dak ix-xogħol lill-eżaminaturi esterni f’viva.
Il-wirja tal-Fakultà tal-Inġinerija sservi bħala opportunità addizzjonali għall-istudenti biex jippreżentaw dak kollu li kienu qed jaħdmu għalih matul l-aħħar erba’ snin lill-pubbliku ġenerali.
Kull min ħa jżur dawn il-wirjiet, se jkollu għażla wiesgħa ta’ oqsma relatati mal-qasam bijomediku, l-enerġija rinnovabbli u l-ambjent, prodotti elettroniċi, robotika, trasport, manifattura, materjali ġodda.
Barra dan, il-Fakultà qed torganizza sessjoni mmirata għal bniet interessati li jissieħbu fil-professjoni tal-inġinerija fejn jistgħu jitkellmu informalment ma’ professjonisti nisa fl-inġinerija u l-STEM f’livelli differenti.
Fis-60 anniversarju minn mindu l-Università offriet għall-ewwel darba programm edukattiv fl-Inġinerija, il-Fakultà nediet l-Engineering Research & Innovation Laboratories, bħala parti minn proġett infrastrutturali fuq skala kbira, waqt il-proġett ta’ Transdisciplinary Research & Knowledge Exchange Project.
Dawn il-faċilitajiet avvanzati ikunu jistgħu jintużaw minn aktar minn 350 student f’livelli ta’ undergraduate, postgraduate u dottorat, li jikkultivaw art fertili għall-bidu ta’ aktar proġetti inventivi.
