L-editur ta’ One News, Aleander Balzan, se jkun qed jappella minn sentenza f’kawża ta’ libell li għamel il-Viċi-Kap tal-Partit Nazzjonalista Beppe Fenech Adami, dwar rapport fuq ir-residenza tiegħu fil-Għargħur li ħareġ f’Marzu li għadda. Ir-residenza saret magħrufa bħala l-“Palazz ta’ Beppe”.
Fil-kawża ta’ libell, Fenech Adami ikkontesta l-fatt li d-deċiżjonijiet li ttieħdu u mar tajjeb minnhom kienu trattament speċjali jew favoritiżmu. Il-Qorti tagħtu €3,000 f’danni.
F’Marzu tas-sena li għaddiet, ONE NEWS irrapporta li deċiżjonijiet tal-gvern ta’ Lawrence Gonzi għamlu r-residenza ta’ Beppe Fenech Adami fil-Għargħur tiswa ferm iktar milli kien il-valur tagħha oriġinarjament.
Fl-2006 il-gvern ta’ Lawrence Gonzi, daħħal ir-residenza lussuża ta’ Beppe Fenech Adami fiż-żoni ta’ żvilupp. Fir-rapport li Fenech Adami għamel oġġezzjoni għalih fil-qorti kien irrapportat ukoll kif fl-2007, il-MEPA applikat hi stess biex il-Palazz ta’ Beppe Fenech Adami jirdoppja fil-kobor tiegħu. Dan b’żieda ta’ sulari u semi-basement.
Il-MEPA applikat ukoll fuq xi proprjetà oħra. Il-Prim Ministru Lawrence Gonzi, f’ittra datata 8 ta’ Ottubru 2008, kien ċaħad it-talbiet tal-MEPA għax qal li dawn imorru kontra id-deċiżjoni tal-gvern. Però mhux hekk għamel għal Beppe Fenech Adami . Fil-każ ta’ Beppe Fenech Adami, t-talba tiegħu kienet aċċettata.
Fit-13 ta’ Ottubru 2008, Lawrence Gonzi kiteb uffiċjalment biex jikkonferma din id-deċiżjoni. Qabel din l-approvazzjoni, Beppe Fenech Adami kien diġà applika biex jgħamel ix-xogħol. Imbagħad, ġimagħtejn wara l-ittra ta’ Gonzi, l-MEPA tat il-permess aħħari.
Dokumenti li kien ippubblika ONE NEWS li juru l-approvazzjoni tal-Prim Ministru ta’ dak iż-żmien għal talba fuq id-dar ta’ Beppe Fenech Adami
