Minn għada jitla s-siparju fuq l-iskedi l-ġodda tal-istazzjonijiet ONE. One Radio fuq il-frekwenza ta’ 92.7 Fm b’diversi programmi varjati għall-familja kollha u t-televiżjoni b’għadd ta’ programmi ġodda u oħrajn stabbiliti u li diġà żammewlna kumpanija fi skedi passati.
Fost oħrajn jiddomina il-programm ta’ Claire Aguis ‘The Local Traveller’, Joseph Chetcuti bil-programm ‘Arani Issa’, il-programm dwar id-dinja tal-films ‘Popcorn’, Nancy Buhagiar tkompli b’aktar riċetti sani waqt ‘Flimkien ma’ Nancy’ u Simone Cini tkompli tilqa’ aktar mistiednin fuq is-sufan tagħha b’intervista waqt ‘Ieqaf 20 minuta’. Pauline Aguis tkompli bil-programm dwar id-djar ‘Indhouse’, filwaqt li d-dinja tal-annimali tkompli tkun diskussa ma’ Nevise Borg Caligari waqt ‘Pink Panther’ u Pierre Borg permezz ta’ Ondroad jitratta d-dinja tal-karozzi.
F’din l-iskeda jkomplu wkoll ‘Manicolo&Co’, ‘Indigo’ ma’ Lon u Josette, ‘It-talks’, ‘KnockAbout Sicilia’ ma’ Owen Bonnici, ‘Sabiħa l-ħajja’ ma’ Joe u Veronika Farrugia u d-Dinja Mutur bl-avventuri bi produzzjoni ta’ Robert Farrugia.
Fost il-programmi ġodda fuq ONE insibu l-programm Darna, Benefiċċji għalik, Nafek, Il-Barbier id-diskursata tat-Tnejn filgħaxija, Għidli Storja b’ rakkonti u esperjenzi ta’ stejjer li seħħew f’pajjiżna, kull nhar ta’ Ħamis filgħaxija, il-programm Grilling il-Ħamis filgħaxija b’mistoqsijiet diffiċli lil mistieden ukoll u l-programm qasir ‘Shooter’ li se jnissel tbissima kuljum mit-Tnejn sal-Ħadd fit-8:35pm.
Se jkomplu l-programmi ta’ ġrajjiet kurrenti u diskussjoni fosthom ‘Awla’ it-Tlieta filgħaxija, ‘Sibt il-Punt’ is-Sibt filgħodu u ‘Paperscan’ il-Ħadd filgħodu. Minn din l-iskeda ta’ kuljum, programm ġdid ipprezentat minn Dorian Cassar u Claudia Cuschieri fis-6pm ‘Bil-Fatti’.
Id-drama ‘Il-Klinika’ se tibda tixxandar kull nhar ta’ Erbgħa fid-8:45pm.
Mit-Tnejn sal-Ġimgħa l-appuntament se jkun il-programm il-ġdid, f’ nofsinhar ‘Ċempel u Irbaħ’ ma’ Pawla, Tiziana Calleja u Janvil.
Wayne Aquilina il-Kap tal-Programmi tat-televizjoni tana aktar dettalji dwar l-iskeda ta’ One.
“Se nistennew skeda impenjattiva, it-telespettaturi ta’ ONE ser igawdu minn madwar erbgħin programm li se jżommu kumpanija lis-segwaċi matul il-ġurnata bi programmi ta’ kuljum, programmi ta’ ġrajjiet kurrenti, programmi sportivi, programmi ta’ diskussjoni, id-drama, programmi ta’ interess ġenerali li żgur se jinżlu tajjeb mas-segwaċi tagħna. Programmi popolari li huma rinomati li ilna nafu fuq dan l-istazzjon, kif ukoll programmi ġodda li ser jingħaqdu f’din l-iskeda l-ġdida.”
Wayne Aquilina, Kap tal-Programmi
Clint Bajada il-Kap ta’ One Radio tana stampa ċara dwar uħud mill-programmi tar-radju, fosthom dawk ġodda; ‘Bl-Ingliż jew bit-Taljan’ bi preżentazzjoni ta’ Ray Grech u Diana Cassar Bonnici. Il-breakfast xow ikompli mit-Tnejn sal-Ġimgħa ma’ Noel Camilleri mis-sitta ‘l quddiem, is-Sibt ma’ Pierre Borg u l-Ħadd ma’ Josef Caruana waqt Bonġu Solid Gold. Jibqgħu għaddejjin il-programmi popolari bħal ‘Għaqqad il-Kelma’, il-Ħadd f’nofsinhar m’ Anton Falzon, ‘L-Aqwa 20 f’Malta’ s-Sibt fil-ħdax ma’ Alfie Fabri, ‘Nisġietna’ ma’ Ray Azzopardi l-Ħamis mis-sagħtejn sal-erbgħa u Makkjetti .
Bajada tana ħjiel dwar il-programm t’aħbarijiet ta’ kull filgħodu.
“Wieħed mill-programmi l-ġodda li ħa jkun importanti ħafna huwa Breakfast News Desk li se jibda jixxandar kuljum mit-Tnejn sas-Sibt, mis-sebgħa neqsin kwart ta’ filgħodu, ħa jkun f’format ta’ programm fejn fih ħa jinkludi l-aħbarijiet, ġrajjiet kurrenti, internazzjonali, gossip, x’se jkun għaddej matul dik il-ġurnata, fih ukoll se jidħlu l-analiżi tal-ġurnali. Kuljum Breakfast News Desk, parti mill-breakfast show, għoxrin minuta sħiħa, sebgħa neqsin kwart ta’ filgħodu.”
Clint Bajada, Kap ta’ ONE Radio
24 siegħa ta’ kwalità mill-qalb, One Radio,mit-Tnejn sal-Ġimgħa, fost il-programm ta’ ġrajjiet kurrenti u politiċi se jinkludu ‘Temi’ li se jixxandar fin-nofs siegħa u ‘Update’ fis-6.05pm filwaqt li Marisa D’amato permezz tal-programm ‘Magazine’ se jkollha diversi mistidnin u esperti fuq suġġetti varji mill-ħdax ta’ filgħodu ‘l quddiem, eżatt wara ‘Morning Mix’ li se jkun qed jixxandar kemm fuq it-televiżjoni u r-radju mid-disgħa sal-ħdax. Ikomplu r-rumanz u l-Istorja flok siesta wara nofsinhar. Charles Marsh u Louis Vella se jagħtuna ‘The Afternoon Show’ filwaqt li d-Drive time huwa fdat f’idejn Dorian Cassar u John Bundy li jalternaw .
