Omm ta’ żewġt itfal li ħadet ritratti ta’ wliedha għarwenin biex tużahom kontra żewġha fi proċess ta’ separazzjoni ġiet ikkundannata tliet snin ħabs wara li l-qorti sabitha ħatja li pproduċiet u li kienet fil-pussess ta’ materjali pornografiku ta’ tfal.
Il-qorti qieset il-każ bħala wieħed gravi għall-fatt li r-ritratti nġibdu minn omm it-tfal li hija wkoll għalliema.
Il-Maġistrat Audrey Demicoli ordnat li isem il-mara jitniżżel fir-reġistru tal-pedofeli u hija ġiet ipprojbita milli taħdem mat-tfal inkluż fil-qasam edukattiv.
Fil-qorti ngħad li l-mara li għandha 36 sena u li isimha ma jistax jixxandar b’ordni tal-qorti, spiċċat investigata mill-pulizija wara li wriet xi ritratti ta’ wliedha u ta’ żewġha għarwenin flimkien lill-kollegi tagħha fuq il-post tax-xogħol.
Il-każ seħħ meta wieħed minn uliedha kellu tliet snin u ieħor kellu sena. Hija qalet lill-pulizija li kienet se tissepara minn ma’ żewġha li kien jiġri fid-dar għarwien. Qalet li riedet tuża r-ritratti fil-proċess ta’ separazzjoni biex turi lill-Qorti li ma kienx idoneu biex ikun mat-tfal.
Hija żiedet tammetti li ħadet ritratti ta’ wliedha għarwenin flimkien ma’ żewġha li wkoll kien ikun għarwien. Dan għax qalet li kien ta’ eżempju ħażin għalihom u li binha kien jirrifjuta li jilbes il-ħwejjeġ għax kien qed jagħmel bħal missieru.
Hija saħqet li r-ritratti ma kinux indiċenti jew pornografiċi. Fil-fatt il-qorti qieset li xi wħud mir-ritratti ma kinux indiċenti.
Madankollu mhux l-istess seta’ jingħad għal ritratti fejn uliedha dehru jippożaw għarwenin b’mod erotiku flimkien ma’ missierhom li kien ikun għarwien ukoll. Kien hemm ukoll xi ritratti fejn it-tfal dehru jmissu l-parti privata ta’ missierhom.
Il-Maġistrat Demicoli qalet li l-ispjegazzjoni tal-omm li kienet qed tippjana li tuża r-ritratti bħala evidenza kontra żewġha ma kinitx leġittima. Hija żiedet tgħid li l-mara ma pprovatx lanqas li kienet se tibda proċess ta’ separazzjoni.
Il-Qorti qalet li l-mara ma tistax taħrab mir-responsabbiltà li ħadet ritratti kompromettenti ta’ wliedha, li żammithom, li għaddiethom lil persuna oħra fuq pen drive biex tistampahom u li wriethom lill-kollegi tagħha tal-iskola biex jagħtuha parir dwar is-separazzjoni. Din mhix kredibbli u lanqas skużabbli,” qalet il-qorti.
Il-Qorti sabitha ħatja li kellha ritratti pornografiċi ta’ wliedha u bagħtitha tliet snin ħabs.
Il-Prosekuzzjoni tmexxiet mill-Ispettur Joseph Busuttil.
