F’Colorado, omm salvat lil binha ta’ ħames snin minn ħalq-il mewt, hekk kif fetħet ħalq il-mountain lion wara li dan kien diġà ħataf lit-tifel. Il-każ seħħ fil-ġnien tad-dar tal-familja, meta l-omm semgħet għajjat kbir u meta ħarġet biex tara x’ġara, sabet lil binha f’ħalq l-iljun.
Għalkemm irnexxielha ssalvalu ħajtu, it-tifel sofra ġrieħi f’wiċċu, f’rasu u f’għonqu. Madanakollu, jinsab f’qagħda stabbli u qed jingħata l-kura fi sptar f’Denver. Uffiċjali qalu li fl-inħawi hemm aktar minn erbat’elef iljun ta’ dan it-tip, u dan l-aħħar qed jiżdiedu r-rapporti ta’ nies li jarawhom fl-inħawi.
