Fl-uniku partita tas-Sibt wara nofsinhar fit-Tony Bezzina Stadium St. Lucia rebħu dwell dirett kontra Pieta bl-skor ta’ 2 – 1.
Santa Lucia dehru l-aħjar tim matul l-ewwel taqsima u ħolqu l-ewwel azzjoni fil-5 minuta permezz ta’ xutt b’saħħtu ta’ Rodrigues Farias li l-goalkeeper Moschin imblokka.
Fis-17-il minuta Yevheni Terzi sab ruħu żmarkat imma minn qagħda tajba xxuttja għoli.
Pieta’ wieġbu bl-ewwel azzjoni tagħhom fl-24 minuta fejn Hovhannisyan qabbeż il-ballun lill-goaler Calleja Cremona minn pass ta’ Temitope imma d-difensur Bangura kklerja dak li deher seta’ jkun goal ċert.
Ħames minuti wara reġa’ kien Hovhannisyan li rċieva mingħand Schembri Wismayer imma x-xutt tiegħu ġie salvat tajjeb minn Calleja Cremona.
Minuta biss wara, fit-30 minuta, Kyrian Nwoko kellu ċans tad-deheb li jpoġġi lil Santa Lucia fil-vantaġġ meta minn qagħda ideali illobbja minn fuq ras il-goaler Moschin imma l-ballun spiċċa ċentimetri ‘l bogħod mil-lasta.
Iżda fid-39 minuta l-istess Kyrian Nwoko patta għal dan in-nuqqas billi skorja l-gowl tal-vantaġġ għal Santa Lucia b’xutt fil-baxx li għeleb lil Moschin.
Pieta’ ħarġu aktar aggressivi fit-tieni taqsima biex fil-61 minuta rebħu penalty meta s-sostitut Takuma Yamaguchi ġie ffawljat fil-kaxxa minn Rodolfo Soares. L-istess Soares intwera l-karta s-safra għal dan il-foul u billi kellu diġa’ karta safra fl-ewwel taqsima, safa mkecci.
Inkarigu ruħu mill-penalty l-istess Takuma Yamaguchi li x-xutt tiegħu mill-11-il metru ġie mblukkat mill-goaler Calleja Cremona imma mir-rebound huwa skorja mill-qrib biex għamel l-iskor 1-1.
Għal xi ħin Santa Lucia dehru maħsuda li mhux biss sofrew il-goal tad-draw imma anke spiċċaw jilgħabu bi plejer anqas, tant li kienu l-Hotspurs li resqu qrib li jiskurjaw fis-67 minuta meta Kean Leonardi xxuttja mill-ewwel mill-kross tajjeb ta’ Yamaguchi, imma l-ballun għadda jħakkek mal-wieqfa.
Mal-ħin pero’ Santa Lucia bdew jirkupraw u saħansitra skurjaw dak li kellu jkun il-gowl deċiżiv fis-76 minuta meta Hehedosh żmarka lil Kyrian Nwoko li minn qagħda ideali qabbeż il-ballun minn fuq ras il-goalkeeper Moschin u ddepożitaħ fix-xibka.
Fil-ħin li kien baqa’ Pieta’ għafsu biex isalvaw ir-riżultat u resqu qrib fl-84 minuta permezz ta’ kross ta’ Terence Agius u daqqa ta’ ras ta’ Clinton Bangura li għaddiet ftit barra.
Żewġ minuti wara Kurt Briffa kkrossja ballun minn fuq ix-xellug li għadda tul il-lasta bla ma sab ebda plejer tal-Hotspurs li seta’ jikkonkludi.
Referee: Matthew Degabriele
Player tal-Loghba: Kyrian Nwoko (Santa Lucia)
