Pajjiżna għandu l-inqas rata ta’ inflazzjoni fi tnejn u tletin xahar, jiġifieri minn Lulju tal-2021. Dan ġie kkonfermat minn ċifri tal-Uffiċċju Nazzjonali tal-Istatistika, l-NSO, hekk kif ix-xahar li għadda, ir-rata annwali tal-inflazzjoni kienet ta’ 1.9% skont l-Indiċi tal-Prezzijiet bl-Imnut.
Din ir-rata hi kważi nofs punt perċentwali inqas mix-xahar ta’ qabel, hekk kif fi Frar din kienet ta’ 2.3%.
Issa r-rata rreġistrata matul ix-xahar li għadda hi l-istess medja tal-inflazzjoni li pajjiżna kellu mindu tela’ Gvern Laburista f’Marzu tal-2013. Dan filwaqt li, taħt l-aħħar Gvern Nazzjonalista, ir-rata medja ta’ inflazzjoni kienet ta’ 2.6% jew terz aktar mir-rata ta’ bħalissa.
Fi statistika wara l-oħra qed joħroġ biċ-ċar li minn Frar, l-inflazzjoni qed tonqos. Dan grazzi għall-inizjattiva ‘Stabbiltà’, li wasslet biex il-prezzijiet tal-ikel f’pajjiżna jonqsu b’mod sinifikanti.
Iżda għall-Partit Nazzjonalista, din l-inizjattiva hi perikoluża u għandha titwaqqaf, kif irrimarka wkoll il-Kap tal-Oppożizzjoni.
Ta’ min jinnota li l-Bank Ċentrali kien bassar li din is-sena r-rata tal-inflazzjoni kellha tkun ta’ 2.9%, waqt li issa, skont dawn iċ-ċifri, ir-rata ta’ inflazzjoni naqqset b’punt perċentwali minn dak li kien imbassar.
Minbarra l-inizjattiva ta’ stabbiltà fl-ikel, Gvern Laburista, immexxi mill-Prim Ministru Robert Abela, żamm stabbli l-prezzijiet tal-enerġija, fosthom tad-dawl u l-fuels.
B’dan fisser li f’Malta l-prezzijiet tal-enerġija baqgħu stabbli, waqt li splodew sew madwar l-Ewropa.
