“Nixtieq nerġa’ niġi ndoqq f’Malta.”
Dan kien il-kliem li għadda l-Maestro André Rieu f’intervista ma’ ONE News, il-Ġimgħa filgħaxija, wara li lesta l-ewwel kunċert minn tnejn li għandu f’pajjiżna.
Il-Maestro saħħar mat-30,000 persuna, fosthom turisti minn tmienja u erbgħin pajjiż differenti, li qegħdin jattendu għaż-żewġ prestazzjonijiet li Rieu qed jagħti fuq il-Fosos tal-Furjana.
Fil-fatt, wara li l-Ġimgħa filgħaxija lesta l-ewwel kunċert tiegħu, f’kumment esklussiv ma’ ONE News, André Rieu sostna s-sodisfazzjon tiegħu li jtella’ l-kunċerti f’pajjiżna tant li spjega li jħares ’il quddiem li jerġa’ jagħti spettaklu f’Malta fiż-żmien li ġej.
Qal, “A holiday for me, no, because it is too hot. But coming back to play, yes of course.”
Mal-wasla tiegħu, mingħajr ebda daqq ta’ tnabar u minkejja li kien se jibda l-ispettaklu, Rieu xorta aċċetta jieħu numru ta’ ritratti ma’ wħud minn dawk preżenti fejn minn hemm mbagħad ingħata bidu għax-xow.
Minn melodija waħda isbaħ minn oħra, flimkien mat-tim tiegħu, Rieu ta spettaklu mill-isbaħ fejn anke talab is-sehem tal-folla, fosthom mal-kanzunetta Volare.
Flimkien ma’ Rieu fuq il-palk għal kanzunetta partikolari, ngħaqdet miegħu ż-żagħżugħa Emma Kok li minkejja li għandha biss 15-il sena. Intqal li qed tgħix il-ħolma ta’ ħajjitha u fejn minkejja li għandha marda rari li taffettwalha l-istonku u tista’ tiekol biss permezz ta’ tubu dirett għall-istonku, xorta waħda għażlet li tkompli ssaħħar lill-udjenza.
Minn hemm Emma kantat il-kanzunetta Viola fejn l-udjenza ssammret issegwiha. Mat-tmiem il-prestazzjoni li tat, l-udjenza ma felħitx tibqa’ sorġuta fuq is-siġġu fejn qamet bilwieqfa u bdiet iċċapċap b’uħud saħansitra anke kellhom demgħa f’għajnejhom.
Il-kumplament tax-xow kien wieħed mexxej u li b’melodija wara oħra lanqas biss tkun taf li sar il-ħin sakemm kanzunetta minnhom ġibdet sew l-attenzjoni tal-udjenza hekk kif kienu ferm familjari magħha.
Din kienet il-kanzunetta Xemx, li mal-ewwel nota tagħha, l-udjenza setgħet tinstema’ tingħaqad flimkien ma’ Rieu tkanta u tgawdi din l-opportunitá mill-isbaħ li wħud minn dawk preżenti kienu ilhom snin twal minn ħajjithom jistennew.
