Il-budget għall-2020 huwa baġit li jsaħħaħ dak li diġà kiseb il-Gvern, filwaqt li jqiegħed il-bażi biex b’mod sostenibbli, ikompli jibni għas-snin li ġejjin.
Hekk iddeskriva l-budget, l-għada li ġie preżentat fil-Parlament, id-Deputat Prim Ministru u Ministru tas-Saħħa Chris Fearne.
Huwa qal li l-budget għas-sena d-dieħla, huwa budget favur il-ġenerazzjoni tal-lum u ta’ għada, favur l-ambjent u l-familji, favur in-negozju, favur l-istudenti.
Iżda fuq kollox huwa baġit favur Malta, li jirrifletti s-suċċessi ekonomiċi u finanzjarji miksuba fl-aħħar snin biex illum, kulħadd jinsab aħjar milli kien ilbieraħ.
Id-Deputat Prim Ministru qal li dan huwa budget ta’ serħan il-moħħ, u b’reazzjoni għal dak li qal il-Kap Nazzjonalista Adrian Delia – li dan huwa budget riċiklat – Chris Fearne qal dan il-budget juri kif il-Gvern qed jindirizza l-isfidi li wiret minn amministrazzjonijiet preċedenti.
Id-Deputat Prim Ministru u l-Ministru għas-Saħħa, Chris Fearne stqarr: “Waqt li aħna nirrepetu, nirriċiklaw, is-suċċessi, Gvernijiet Nazzjonalisti kienu jirriċiklaw il-fallimenti, jiġifieri fejn qabel, sena wara l-oħra, konna naraw qgħad dejjem jiżdied, mediċini out of stock, problemi ta’ defiċit fil-budgets, issa aħna qed naraw soluzzjonijiet, suċċessi, sena wara l-oħra iżjed xogħol, sena wara l-oħra surplus, iżjed mediċini ġodda fuq il-formularju tal-Gvern, sena wara l-oħra ekonomija iżjed vibranti.”
Il-Ministru tal-Finanzi, il-Professur Edward Scicluna, innota li bħalma l-faċċati tal-gazzetti rrappurtaw bi prominenza miżuri differenti, hekk ukoll il-familji u l-individwi se jgawdu minn miżuri diversi.
Semma kif il-budget jilqa’ għal diversi sfidi, fosthom dawk lokali li nħolqu mis-suċċess ekonomiku, iżda wkoll internazzjonali bħal Brexit u l-ġlieda kummerċjali li qed taffettwa t-tariffi bejn iċ-Ċina u l-Amerka.
Il-Ministru żied li l-Gvern mhux biss isib soluzzjonijiet għall-isfidi, iżda jagħraf ukoll l-opportunitajiet, fosthom fis-settur tat-teknoloġija.
Innota li dan il-budget iwieġeb għal kull bżonn, u l-miżuri kollha ntgħażlu wara konsultazzjoni wiesgħa.
Il-Ministru għall-Finanzi, Edward Scicluna spjega kif “Kien hemm ħafna miżuri, dawn huma fost l-iktar li ħsibniehom adattati għal dal-budget wara li rajna l-impatt tagħhom kemm fuq il-finanzi imma l-iktar fuq is-soċjetà Maltija. Domna ngħarbluhom, domna nistudjawhom, kienu mirquma biex ikunu adattati, la jkunu abbużati iżda li jilħqu lil min hu fil-bżonn, dan qed nitkellem fuq soċjal jiġifieri xita ta’ miżuri kienu ilhom jiġu studjati ħafna u aħna kuntenti li daħħalniehom.”
It-tnejn qablu li l-budget għas-sena d-dieħla sar frott deċiżjonijiet kuraġġużi li ħa l-Gvern, fosthom li jaqta’ l-użu tal-plastik li jintuża darba, u li ma jibqgħux jiġu impurtati karozza li jniġġsu.
