Tmintax-il uffiċjal tad-Dipartiment tal-Protezzjoni Ċivili għaddejjin b’kors ta’ tliet ġimgħat, li qed isir għat-tieni darba f’erba’ snin, biex ikunu mħejjija aħjar għal kif għandhom jirreaġixxu fuq sit ta’ inċident.
Id-Direttur Ġenerali tad-Dipartiment tal-Protezzjoni Ċivili, Emanuel Psaila, spjega kif l-ewwel ġimgħa kienet ibbażata fuq teorija. Fit-tieni ġimgħa saru numru ta’ eżerċizzji u fit-tielet ġimgħa se ssir prattika diretta.
Qal, “Dan jiffoka l-iktar fuq kif station officer għandu jġib ruħu meta joħroġ hemm barra bħala uffiċjal, mhux leading issa, mhux imexxi shift imma issa r-responsabbiltà tiegħu kibret li jrid imexxi stazzjon allura jaf jaffaċċja l-midja, jaf jaffaċċja l-politiku, jaf jaffaċċja ċirkostanzi strambi u jrid imexxi inċident.”
Is-Sur Psaila spjega li l-uffiċjali qed jiġu preżentati l-aktar xenarji diffiċli.
Spjega, “Hemm ħafna xenarji. Eżempju jaqbad il-Palazz tal-President fejn għandek affarijiet li huma prestiġjużi kif għandhom joħorġu, għandna attentat ta’ suwiċidju, għandna wkoll splużjoni ta’ kmamar tan-nar jew nirien ġo djar tal-anzjani jew gas leak ġo sptar.”
Żewġ xenarji minn dawn raw is-sehem ta’ crew ta’ ONE News, li ħa sehem fl-eżerċizzju u mar jistaqsi lill-uffiċjali għad-dettalji tal-inċident.
Fil-każ tal-attentat ta’ suwiċidju li taparsi sar f’lukanda, ħadet sehem persuna li għamlitha ta’ omm il-vittma, li marret fuq ix-xena tibki biex titħalla tidħol ħdejn binha. Fl-istess waqt, mar dak li għamilha tas-sid tal-lukanda joħloq kommossjoni biex ma jingħatax isem ħażin lill-post.
Fil-każ tad-djar tal-anzjani, l-attriċi għamlitha ta’ bint anzjan maqbud fil-binja, u dak li għamilha ta’ politiku jitlob id-dettalji.
Taħt dawn il-pressjonijiet, l-uffiċjali riedu jwieġbu b’mod meqjus filwaqt li jkomplu għaddejjin b’xogħolhom.
Is-Sur Psaila qalilna li bniedem avżat nofsu armat, u jemmen li dawn l-eżerċizzji ħa jservu mitqlu deheb għall-uffiċjali.
Spjega kif, “Qed nagħmluhielhom daqsxejn diffiċli m’aħniex nibagħtulhom l-assistenza li qegħdin jitolbu ħalli naraw kif ħa jmexxu f’ċirkostanzi diffiċli u nemmen li wara nagħmlu de-brief ta’ kull exercise, inlaqqgħuhom kollha flimkien u nemmen li qiegħed joħroġ ħafna ġid u la joħorġu hemm barra, ħa jkunu uffiċjali tajbin.”
