“Fl-ewwel ta’ Mejju ngħaqdu magħna fil-Belt Valletta ħalli nibgħatu messaġġ ċar ħafna favur għajnuna lin-negozji u lill-familji tagħna.”
Dan kien il-messaġġ ewlieni li għadda l-Prim Ministru u Mexxej Laburista, Robert Abela f’attività politika mtella’ l-Ħadd filgħodu fiċ-Ċentru Laburista tar-Rabat.
Fid-diskors tiegħu, Abela tkellem dwar kif fiċ-ċentru tal-ħidma tal-Gvern b’rabta mal-ekonomija dejjem hemm il-ħaddiem u min iħaddem. Prinċipju li huwa fil-qofol taċ-ċelebrazzjonijiet tal-ewwel ta’ Mejju tal-Partit Laburista.
Dan iwassal biex pajjiżna jikseb riżultati pożittivi li jħallu effetti tanġibbli fil-ħajja tal-familji Maltin u Għawdxin.
“Ir-riżultati tiksibhom ukoll billi quddiem l-isfidi tibqa’ mal-ħaddiema u viċin in-negozji. X’inhuma l-aktar riżultati illi qegħdin niksbu? Ix-xogħol. Il-ħolqien tax-xogħol għal kulħadd. Ix-xogħol illi jfisser opportunitajiet aħjar għaż-żgħażagħ u għall-familji Għawdxin u Maltin.”
Dr Abela tkellem ukoll dwar l-esperjenzi li ltaqa’ magħhom hekk kif fl-aħħar jiem huwa iltaqa’ ma’ diversi ħaddiema u imprendituri fuq il-lantijiet tax-xogħol f’Malta u kif ukoll f’Għawdex.
Lil hinn mill-investiment, il-Prim Ministru sostna kif l-għajnuna li jagħti l-Gvern fi żmien ta’ sfida wkoll isservi ta’ spalla għall-ħaddiema u min iħaddem.
Huwa stqarr kif l-għajnuna tal-Gvern b’mod partikolari fil-forma ta’ sussidji fil-prezzijiet tal-enerġija kienet apprezzata ferm minn min iħaddem.
“Però qalli ħaġa oħra wkoll ‘B’din l-għajnuna li tajtu assigurajtu l-postijiet tax-xogħol ta’ tant u tant ħaddiema.”
Dr Abela innota kif l-istess sar permezz tal-Wage Supplement bħala parti mill-miżuri li ttieħdu fi żmien l-isfida tal-Covid-19.
Dan wassal biex min iħaddem baqa’ jaħseb kif se jkun qiegħed ikabbar u jespandi l-operat tiegħu minflok kif ħa jċekken l-operat, bħal ma qiegħed jiġri f’pajjiżi ġirien tagħna.
Il-Mexxej Laburista tkellem ukoll dwar esperjenzi oħra li ltaqa’ magħhom.
“Kemm kien sabiħ imbagħad nisma’ stejjer ta’ min beda jaħdem ġewwa fabbrika daħal fid-dinja tax-xogħol meta kien żagħżugħ. Beda ġo fabbrika, beda fl-inqas grad fuq il-post tax-xogħol u llum baqa’ tiela’, skaluna, skaluna, mal-mogħdija taż-żmien. U illum il-ġurnata huwa ‘manager’ imexxi kumpanija li tħaddem magħha mijiet ta’ ħaddiema. Dawn huma l-ħolm, dawn huma l-esperjenzi li rridu nibqgħu nagħmlu realtà.”
B’mod aktar wiesa’ l-ħolm u l-aspirazzjonijiet li ntlaħqu wasslu biex il-qagħad f’pajjiżna niżel għall-aktar livelli storikament baxxi.
“Kemm ilni Prim Ministru l-ammont ta’ dawk jirreġistraw għax-xogħol naqas b’erbgħin fil-mija. Kull tlett ijiem, żewġ persuni li qabel ma kellhomx impjieg sabu xogħol u nibqgħu nagħmlu dan billi ngħinu lin-nies.”
Il-Mexxej Laburista imbagħad ikkonkluda d-diskors tiegħu b’appell b’saħħtu għaċ-ċelebrazzjonijiet tal-ewwel ta’ Mejju.
“Nhar l-ewwel ta’ Mejju, ilkoll għandna l-opportunità biex nuru fejn tħabbat il-qalb tagħna, il-qalb tal-ħaddiema, il-qalb ta’ min iħaddem, il-qalb tal-pensjonanti. Ejjew nibqgħu naħdmu lkoll flimkien ħalli l-elf proposta ta’ ‘Malta Flimkien’, naqilbuhom f’elf kisba għal pajjjiżna.”
