Is-Sibt li ġej filgħaxija, waqt l-edizzjoni ta’ din is-sena tal-Valletta Pageant of the Seas, dawk li se joħonqu x-Xatt ta’ Liesse biex isegwu l-ispettaklu kemm fis-smewwiet, kif ukoll il-baħar li jdawwar il-ġmiel tal-Port il-kbir, se jgawdu spettaklu mill-iprem.
Għadd ta’ dwal u projezzjonijiet se jirrakkuntaw viżwalment uħud mill-avvenimenti li sawru l-istorja għanja ta’ pajjiżna li missirijietna għaddew minnha b’tema ambjentali.
Il-logħob tan-nar tal-ajru, imżewweġ man-noti mużikali li se jżewqu ħlejju din il-lejla sajfija, se jkomplu joffru lill-pubbliku Malti u t-turisti li ħa jinġabru fix-xtut li jdawru dan il-port uniku u maestuż fid-dinja, serata spettakolari u unika.
Gavin Gulia, Chairman tal-Awtorità Maltija tat-Turiżmu spjega l-importanza ta’ dan l-avveniment għall-qasam turistiku f’pajjiżna.
“L-Awtorità Maltija tat-Turiżmu tirkeb fuq events bħal dawn, sabiex tkompli tkattar it-turiżmu u tkompli ssaħħaħ ir-reklamar ta’ pajjiżna barra minn Malta però mhux hekk biss, imma t-turisti li ħa jkunu hawnhekk għandhom l-opportunità sabiex igawdu esperjenza li tkompli żżid mal-esperjenza ħolistika illi wieħed jixtieq li jmorru lura f’pajjiżhom jgħidu kemm ħadna pjaċir u anki jħajru qraba u ħbieb tagħhom sabiex jersqu lejn pajjiżna.”
F’kummenti ma’ ONE News, iċ-Chairman tal-Aġenzija Kulturali għall-Belt Valletta, Jason Micallef, irringrazzja lill-mijiet ta’ persuni involuti fl-edizzjoni ta’ din is-sena tal-Valletta Pageant of the Seas, u sejjaħ l-avveniment bħala Teatru fil-baħar.
“Għall-ħames okkażjoni speċjali tal-Valletta Pageant of the Seas, li ilna ntellegħuh għall-aħħar għaxar snin ħejjejna spettaklu mill-isbaħ fosthom logħob bil-funtani li qatt ma rajna bħalhom f’Malta li se jkunu qed jidħlu taħt l-ilma jagħtu spettaklu, logħob tan-nar sinkroniżżat, imma wkoll storja ta’ tfajjel li se tqajjem kuxjenza partikolari fuq Save the Seas, b’tema ambjentali kontra t-tniġġiż ta’ madwarna, fil-baħar u l-Meditterran. L-appell tiegħi hu biex is-Sibt filgħaxija fid-disgħa jinġabar ix-Xatt ta’ Liesse biex igawdi dan l-ispettaklu uniku.”
