Fl-okkażjoni tal-European Week of Sport il–Gozo Motocross Association ser torganizza lejla ta’ sport bil-muturi u karozzi ġewwa il-korsa taz-żwiemel f’Ta’ Xħajma Għawdex.
It-tieni edizzjoni ta’ Saturday Night MX ser issir nhar is-Sibt 22 ta’ Settembru2018 mill-4 ta’ wara nofsinhar sal 11 ta’ bil-lejl.
Matul din il-lejla ser naraw tlielaq motocross fuq trekk magħmula apposta fuq art maħruta. Din it-trekk ser tkun kemmxejn differenti minn tas-soltu u s-sewwieqa ser ikollom esperjenza interessanti u eċitanti. Matul din is-serata, ser naraw ukoll tlielaq Autocross li wkoll ser issir trekk apposta għalihom. Dan l-isport huwa mfittex ħafna mid-dilettanti tal-karozzi Għawdxin u għaldaqstant l-għaqda ħasbet biex dan l-isport tagħtih spinta.
Il-muturi Trials ukoll ser ikunu preżenti. Grupp ta’ sewwieqa Maltin ser juru abilita’ straordinarja billi jimmanuvraw il-muturi tagħhom fuq oġġetti poġġuti apposta. Hawnhekk mistennija li naraw ħeffa u bilanċ minn dawn is-sewwieqa. Ma dawn ser jingħaqdu wkoll grupp ta’ sewwieqa tfal li ser jagħtu wirja sabiħa bil-muturi taġħhom.
