Hekk kif qed isiru l-aħħar preparamenti għat-tielet Rally Team Malta, is-Segretarju Organizzattiv tal-Partit Laburista, William Lewis, ħabbar kif kawża tat-temp prevvist, ir-Rally ta’ nhar il-Ħadd li ġej se jkun qed isir fuq il-Fosos tal-Floriana minflok fi Pjazza Tritoni.
Spjega kif se tkun qed tittella’ tinda, l-akbar li qatt ra l-poplu Malti waqt kampanja elettorali, liema tinda se tkun qed tilqa’ folla sabiħa.
Fil-bulettin tal-aħbarijiet ta’ ONE, Lewis spjega kif l-attività se tkun imżewqa b’mużika mill-isbaħ permezz ta’ DJs rinomati u kif ukoll il-band Versatile li se jkunu qed jallegraw lil dawk li se jkunu qed jingħaqdu hemm.
Il-qofol se jkun qed jintlaħaq bid-diskors tal-Prim Ministru Robert Abela fejn se jkun qed jitkellem dwar il-viżjoni tal-Partit Laburista li se tkun qed twassalna għall-elezzjoni ġenerali fis-26 ta’ Marzu.
Kull min hu interessat biex jingħaqad għar-Rally Team Malta nhar il-Ħadd li ġej jista’ jidħol fuq robertabela.mt u jibbukja post minn fuq dak is-sit.
