Naxxar Lions irritornaw għar-rebħ wara serje ta’ riżultati negattivi biex ħadu nifs ġdid fit-tentattiv li jitbegħdu miż-żona tar-relegazzjoni. Kienet rebħa mistħoqqa għalihom waqt li mill-banda l-oħra Hibernians iddiżappuntaw bill-kbir b’wirja negattiva.
L-ewwel taqsima kienet pjuttost kwieta u nieqsa mill-azzjonijiet. Kienu Naxxar li ħolqu l-ewwel azzjoni fit-tieni minuta meta xutt tajjeb ta’ Servo de Carvalho ġie salvat f’corner mill-goalkeeper Kone.
In-naħa l-oħra fit-8 minuta xutt ta’ Alex Bruno de Souza ġie salvat b’diffikulta’ mill-goalkeeper Naxxari Matthias Debono.
Kellna mbagħad nistennew sal-għoxrin minuta biex naraw azzjoni oħra denja meta Kone antiċipa tajjeb lil Servo de Carvalho minn cross ta’ Edson Cerqueira.
Fil-35 minuta kienu Hibernians li heddew permezz ta’ xutt ta’ Claudio Bonanni li Debono salva tajjeb.
Hibernians fetħu fuq l-attakk u fid-49 minuta De Souza żmarka tajjeb lil Giannis Bastianos li kkrossja għan-nofs flok ixxuttja biex ma sab lil ħadd u ċ-ċans intilef.
Naxxar Lions wieġbu żewġ minuti wara b’azzjoni li ssarrfet fil-goal tal-vantaġġ. Servo de Carvalho daħal fil-kaxxa fejn qabeż plejer qabel għadda l-ballun lil Maicon Da Silva li minn qagħda ideali tefa’ l-ballun fix-xibka.
Naxxar reġgħu resqu qrib erba’ minuti wara imma Kone salva tajjeb id-daqqa ta’ ras ta’ Servo de Carvalho.
Hibernians ippruvaw iwettqu reazzjoni imma l-kontrattakk tal-Lions kompla jkun effettiv tant li fit-62 minuta huma għamlu l-iskor 2-0 meta Servo de Carvalho avvanza fuq ix-xellug, daħal fil-kaxxa u kellu x-xutt tiegħu jiġi mblukkat imma mir-rebound huwa għola tajjeb biex bir-ras tefa’ l-ballun fir-rokna tax-xibka.
Dan it-tieni goal kompla għaddas lil Hibernians li xejn ma kienu effettivi fit-tentattiv li jerġgħu jidħlu fil-logħba, anke minħabba l-fatt li d-difiża tal-Lions ikkontrollat tajjeb is-sitwazzjoni.
Fit-80 minuta kien id-difensur Ferdinando Apap li ttanta xortih għal Hibernians b’xutt li l-goalkeepr Debono salva tajjeb.
Ċans ieħor ghal Hibernians wasal fid-89 minuta meta minn freekick mogħti minn Jurgen Degabriele, Kurt Shaw bir-ras xeħet għan-nofs imma Rodney Antwi minn qagħda tajba xxuttja tul il-lasta u barra.
Referee: Andrea Scriha
BOV Plejer tal-Logħba: Pablo Augusto Servo de Carvalho (Naxxar Lions)
