Naxxar Lions rebhu d-Derby tat-Tramuntana meta għelbu lill-ġirien iżda rivali Mosta bl-iskor strett ta’ 2-1.
Kienet rebħa meritata għal-Lions hekk kif kienu huma li ddettaw il-logħob, bl-iskor saħansitra seta’ kien akbar favurihom li kieku kienu iktar preċiżi fl-attakk u daħkitlelhom iktar il-fortuna hekk kif laqtu żewġ lasti tul id-90 minuta.
Kienu Naxxar li ħolqu l-ewwel periklu fis-seba’ minuta permezz ta’ xutt mill-ewwel mid-distanza ta’ Takuma Yamaguchi li ħabat mal-wieqfa, b’Mosta jeħilsuha ħafif.
Huma reġgħu ħolqu l-periklu fit-22 minuta meta xutt minn tarf il-kaxxa ta’ Degran Jackson għadda ftit barra.
Naxxar komplew jiddettaw il-logħob u fit-33 minuta fetħu l-iskor meta Caxambu xeħet cross għan-nofs li sab lil TAKUMA YAMAGUCHI li ma kellux diffikultá ikompli għal ġewwa.
Dan sabiex fil-41 minuta Caxambu dejjem għal Naxxar kellu xutt b’saħħtu iżda ċentrali mid-distanza jiġi salvat mill-goalkeeper ta’ Mosta, Sean Mintoff.
Mosta ħolqu l-ewwel azzjoni perikoluża tagħhom fit-48 minuta meta Clayton Failla agada tajjeb lejn Richard Luca Da Silva li kellu l-konklużjoni angolata tiegħu minn ġol-kaxxa tintemm ftit barra.
Naxxar tilfu ċans ta-deheb li jirduppjaw l-iskor fl-54 minuta meta Yamaguchi kellu x-xutt tiegħu minn taħt il-lasta jintemm ftit għoli.
Il-partita kompliet tisbieħ u minuta biss wara xutt b’saħħtu ta’ Richard Luca Da Silva ġie mdawwar f’corner bi bravura mill-goalkeeper ta’ Naxxar, Matthias Debono.
Fl-74 minuta Mosta rebħu penalty meta cross ta’ Zachary Brincat ħabat ma’ id Caxambu. Mill-11-il metru inkariga ruħu l-ispeċjalista CLAYTON FAILLA li ma ħafirx hekk kif tefa’ l-ballun naħa u lil Matthias Debono n-naħa opposta.
Naxxar wieġbu żewġ minuti wara permezz ta’ freekick insidjuż ta’ Caxambu li ħareġ l-aħjar ta’ Sean Mintoff li dawwar f’corner bi bravura.
Huma skorjaw il-goal tar-rebħa fil-81 minuta meta minn indeċiżjoni ta’ Mintoff li kellu ħarġa kemmxejn difettuża, NEIL PACE COCKS kien fil-post opportun u minn taħt il-lasta spara ġewwa.
Naxxar komplew fuq l-offensiva u erba’ minuti wara s-sostitut Gustavo Barbosa Santos għadda tajjeb lejn Degran Jackson li dar tajjeb ma’ difensur ta’ Mosta qabel kellu x-xutt tiegħu jistampa mal-mimduda.
Huma komplew jamministraw il-vantaġġ minimu li kellhom sa tmiem il-partita.
Referee: Slobodan Petrovic
Plejer tal-Logħba: Takuma Yamaguchi (Naxxar L.)
