B’wirja mill-aqwa, Naxxar Lions, ħasdu lil Birkirkara meta għelbuhom bl-iskor ta’ 2-0, biż-żewġ goals għalihom jaslu fit-tieni taqsima. B’hekk huma kkastigaw lill-Istipes għat-tieni telfa konsekuttiva.
Kienu Naxxar li ħolqu l-ewwel periklu wara biss sitt minuti meta freekick taż-żagħżugħ Neil Pace Cocks għadda ftit barra. Huma komplew jippressaw u fl-20 minuta, Pablo Augusto De Carvalho avvanza tajjeb fil-kaxxa iżda kellu x-xutt fil-baxx tieghu salvat tajjeb mill-goalkeeper Pollakk tal-Istripes, Marcel Zapytwosky.
L-Istripes wieġbu fl-34 minuta meta Adailton għadda tajjeb lejn Alex Satariano li minn taħt il-lasta kellu t-tentattiv tiegħu jistampa mal-wieqfa. Il-karkariżi reġgħu ħolqu l-periklu fit-42 minuta, permezz ta’ freekick mid-distanza ta’ Simon Zibo, li ntemm għoli. Dan sabiex żewġ minuti biss wara, Yannick Yankam, naqas milli jagħmel kuntatt mal-ballun minn cross mil-lemin, bl-azzjoni tisfuma fix-xejn biex l-ewwel taqsima intemmet f’parita ta’ 0 – 0.
Fil-ftuħ tat-tieni taqsima, Naxxar Lions, ħarġu ferm aggresivi u ta’ dan ġew ippremjati meta fis-57 minuta fetħu l-iskor permezz ta’ xutt mill-isbaħ ta’ Edson Cerquira Farias li ma ta l-ebda ċans lill-goalkeeper ta’ Birkirjara, Zapytowski, bil-ballun jintemm fis-saqaf tax-xibka.
Birkirkara wieġbu fit-63 minuta u kellhom ferħa bla temma meta Alex Satariano kellu x-xutt mill-ewwel tiegħu jintemm ġewwa, iżda r-referee Malcolm Spiteri, iġġudika li l-istess player kien f’pożizzjoni ta’ offside. Huma komplew ifitxxu l-goal tad-draw u seba’ minuti wara, Enmy Manuel Pena Beltre għadda tajjeb lejn Maxuell Maia li x-xutt tiegħu ħareġ l-aħjar tal-goalkeeper żagħżugħ ta’ Naxxar, Matthias Debono, li dawwar f’corner bi bravura.
Iżda kienu Naxxar li resqu viċin li jirdoppjaw l-iskor fl-74 minuta meta Wiliam Marcilo da Silva kellu xutt b’saħħtu fil-baxx minn ġol-kaxxa jaħbat max-xibka minn barra, biex ta l-illużjoni tal-goal.
Birkirkara reġgħu ħolqu l-periklu fit-78 minuta permezz ta’ semi-rovexxjata minn taħt il-lasta ta’ Maxuell Maia li iżda ntemmet barra.
Naxxar Lions ssiġillaw ir-rebħa permezz tat-tieni goal fil-85 minuta meta Edson Cerqeuira Farias serva fuq platt tal-fidda lil William Moreira Da Silva, li venven xutt mill-ewwel fil-baxx, bil-ballun jintemm fir-rokna tax-xibka.
Referee: Malcolm Spiteri
BOV Plejer tal-Logħba: Edson Farias Cerqueira (Naxxar)
