Fadal biss xahar għar-raba’ edizzjoni tal-festival Mużika Mużika, b’għoxrin kanzunetta oriġinali bil-Malti.
Il-Festival Mużika Mużika għal darb’oħra ser jerġa’ joffri pjattaforma prestiġjuża lill-kontestanti, fejn ser jiġu ppreżentati għoxrin kompożizzjoni bil-Malti, akkumpanjati mill-Malta Philharmonic Orchestra.
F’konferenza tal-aħbarijiet tħabbru l-aħħar dettalji ta’ dan il-festival, li ser isir bejn l-14 u s-16 ta’ Marzu 2024.
Fil-fatt, Frans Agius, il-Kap Eżekuttiv ta’ Festivals Malta, ħabbar li din is-sena l-palk ta’ Mużika Mużika ser ikun qed jinkludi elementi 3D biex juri moviment bil-viżwali minn kwalunkwe angolu, kif ukoll għadd kbir ta’ LED screens u elementi jiċċaqalqu li ser jikkumplimentaw l-istil uniku tal-palk.
Ġie mħabbar fost oħrajn li l-preżentaturi għal din is-sena se jerġgħu jkunu Keith Demicoli, Clare Agius, u Moira Delia. Intqal li din is-sena l-mistiedna speċjali se jkunu ħadd ħlief Gianluca Bezzina li rebaħ it-tielet edizzjoni tal-festival, kif ukoll Shaun Farrugia, li rnexxielu jikseb suċċess kbir internazzjonalment.
Tkellem ukoll id-Direttur Artistiku tal-Festival, Paul Abela, li qal li din is-sena ser nerġgħu naraw il-Lejla tal-Klassiċi, li ser issir fil-15 ta’ Marzu. Lejla li bosta nies jistennewha bi ħġarhom biex jesperjenzaw kanzunetti klassiċi Maltin li ser jiġu interpretati minn diversi kantanti stabbiliti fix-xena tal-mużika lokali.
Intant, ic-Chairperson ta’ Festivals Malta Aaron Zahra tkellem fuq il-preparamenti loġistiċi tal-festival u kif it-tim ta’ Festivals Malta qed jaħdem biex jibqa’ jgħolli l-livell tal-festival. Hu tkellem ukoll dwar il-biljetti għall-festival, li diġa huma disponibbli fuq is-sit elettroniku tal-festival.
Min-naħa tiegħu, iċ-Chairperson ta’ Mużika Mużika, Ray Bugeja, kompla jisħaq fuq l-importanza ta’ Mużika Mużika, li sena wara sena jibqa’ jgħolli l-livell tiegħu kemm fejn tidħol produzzjoni kif ukoll fuq livell artistiku.
Il-Ministru għall-Wirt Nazzjonali, l-Arti u l-Gvern Lokali Owen Bonnici qal li bħalissa t-tim ta’ Festivals Malta qed jaħdem qatigħ biex Mużika Mużika jerġa’ jkun ta’ suċċess għar-raba’ sena konsekuttiva.
Għall-biljetti u aktar informazzjoni żur muzikamuzika.mt.
