B’referenza għall-istorja ppubblikata llum dwar l-eksMinistru tal-Finanzi Tonio Fenech, il-Prim Ministru Joseph Muscat qal li bl-istandards politiċi li qed jipprova jbella’ Simon Busuttil, Fenech għandu jirriżenja mill-Parlament.
Muscat spjega kif Tonio Fenech, fid-dikjarazzjoni tal-assi tiegħu għamel lista’ ta’ kumpaniji iżda ma qalx x’inhuma. Ħareġ ukoll li huwa ċ-ċermen ta’ kumpanija li hija fully-owned minn kumpanija oħra tal-British Virigin Islands – l-istess sistema li wasslet biex kien hemm Ministru Spanjol jirriżenja.
B’reazzjoni għal dan, l-eksMinistru Fenech qal li mhu qed jagħmel xejn illegali.
Muscat qal li llum qed niskopru wkoll li Fenech huwa Segretarju ta’ kumpanija li xogħolha tiftaħ it-trusts f’pajjiżi oħra.
“Skoprejna wkoll li Fenech, li kien ukoll Ministru tal-Finanzi, li kien responsabbli minn shares tal-Gvern fil-Bank of Valletta, li ftit wara li spiċċa minn Ministru tal-Finanzi jiftaħ kumpanija ma’ persuna oħra li kienet CEO il-BOV u qiegħed f’kumpanija ma’ persona oħra li kienet responsabbli għall-ftuħ ta’ trusts fil-BOV stess.”
Fi kliem Muscat qal li bl-istandards li qed jipprova jbella’ Busuttil, Tonio Fenech għandu jirriżenja mill-Parlament.
Joseph Muscat qal dan waqt attività politika fil-Qrendi li ntemmet ftit tal-ħin ilu.
https://youtu.be/K-i2czERekY
Il-kelliem sfida wkoll lill-Kap tal-Oppożizzjoni Simon Busuttil biex ikun ċar jekk hux qed jallega hemmx xi forma ta’ korruzjoni dwar il-btala li kellu f’Dubai.
Il-Prim Ministru serraħ ras Busuttil li meta jkun il-waqt, se jkun qed jippubblika l-karti kollha. Żied jgħid li meta jagħmel dan, Busuttil se jkollu ħafna x’jippubblika min-naħa tiegħu.
Intant, huwa għamel referenza għal żewġ aħbarjiet li komplew jagħtu enerġija lil dan il-Gvern, inkluż dak li ħabbret il-Kummissjoni Ewopea dwar Malta, jiġifieri li l-ekonomija ta’ Malta se tibqa’ miexja ‘l quddiem, li l-poplu Malti se jkollu l-flus fil-but biex ikompli jonfoq u li se jkun hawn aktar xogħol milli hemm f’pajjiżi oħrajn.
“Ma teżistix politika li magħhom m’hemmx riskji. Stajna għamilna bħal ta’ qabilna, jiġifieri namminsitraw minflok immexxu.”
Il-Prim Ministru qal li ma kintix deċiżjoni faċli li jitraħħsu l-kontijiet tad-dawl u l-ilma, iżda kienet deċiżjoni li bidlet wiċċ il-pajjiż għax se tkun qed tħalli €80 miljun fis-sena fil-bwiet tan-nies. Fi kliemu dan wassal biex in-negoazjanti jimpjegaw iżjed persuni, u jkomplu jinvestu.
“Meta ħallejt iżjed flus fil-bwiet tan-nies, dawn qegħdin jonfquhom, u r-rota tkompli ddur.”
Għamel referenza wkoll għas-servizz taċ-childcare b’xejn, liema inċentiv wassal biex iktar nisa daħlu fid-dinja tax-xogħol u bdew jikkontribwixxu bil-ħlasijiet tat-taxxa.
Fl-okkażżjoni ta’ Jum l-Omm, il-Prim Ministru sellem l-ommijiet kollha, inkluż lil dawk li m’għadhomx magħna u lil dawk li jixtiequ jsiru ommijiet iżjda ma jistgħux.
Huwa qal li bħal-lum tiżdied il-ħeġġa u r-rieda tagħna li nkomplu għaddejjin bil-programm tagħna tal-IVF li permezz tiegħu, għexieren ta’ nisa li ma setgħux ikunu ommijiet, fl-aħħar saru ommijiet.
L-attività politika kienet indirizzata wkoll mill-Ministru Josè Herrera u d-Deputat Charles Mangion.
