Fil-logħba prinċipali tal-ġimgħa mill-Enemed Women’s Futsal League, Mtarfa u Lija Athletics A temmew il-konfront ta’ bejniethom fi draw ta’ 4-4. Kienet logħba inċerta sal-aħħar li ħalliet lil dawk kollha preżenti fil-Padiljun ta’ San Alwiġi fuq ix-xwiek. Lija kienu qed igawdu vantaġġ ta’ 3-0 sa tmiem l-ewwel taqsima filwaqt li żiedu ieħor mal-ftuħ tat-tieni taqsima, Minkejja kollox, it-tfajliet mill-Imtarfa ma qatgħux qalbhom u filwaqt li żiedu l-isforzi tagħhom, irnexxielhom jiskorjaw erba’ gowls u jġibu l-iskor indaqs. Fallon Zammit, Irena Drugovic, Michela Felice u Ruth Steer Cheetham fetħu vantaġġ ta’ erba’ gowls għal Lija sabiex doppjetta ta’ Demi Magrin, gowl ta’ Elisa Csik u awtogowl ta’ Michela Felice ġabu l-iskor indaqs għal Mtarfa. Referees: Clint Cassar u Jonathan Balzan.
Swieqi United għelbu lil Lija Athletics B 2-1 sabiex laħquhom fil-klassifika u kisbu l-ewwel tliet punti tal-istaġun. Kienet logħba ferm bilanċjata tant li sa tmiem l-ewwel taqsima, l-iskor kien għadu 1-1. Fit-tieni taqsima, Swieqi skorjaw il-gowl rebbieħ li tahom it-tliet punti tant importanti. Danna Fuentes poġġiet lil Swieqi minn fuq sabiex Lised Romero ġabet l-iskor indaqs għal Lija B. Fit-tieni taqsima, Vanessa Caneino skorjat il-gowl rebbieħ għal Swieqi. Referees: Danilo Francalanza u Jonathan Balzan.
Klassifika – Mtarfa Futsal, Lija Athletics A Futsal 7, Lija Athletics B Futsal, Swieqi United Futsal 3, University of Malta ACJ Group, Santa Margerita AFC Futsal 1, Parr Mela Rockets FC Futsal 0
