F’Marzu 2025, iċ-ċiklisti Maltin Etienne Bonello u Marie Claire Aquilina ser jkunu qedin jiktbu l-istorja taċ-ċikliżmu Malti hekk kif jippreparaw biex jieħdu sehem fit-tellieqa prestiġjuża tal-mountain bike, l-Absa Cape Epic, fl-Afrika t’Isfel.
Din il-kompetizzjoni eċċitanti u intensiva mifruxa fuq tmien ijiem, spiss hija deskritta bħala t-Tour de France tal-mountain biking. It-tellieqa hija magħrufa għat-terren estrem u l-isfidi fiżiċi li tippreżenta. Bonello u Aquilina se jikkompetu fil-kategorija Mixed, fejn it-timijiet jikkonsistu minn żewġ ċiklisti – wieħed maskili u l-oħra femminili, u dan iżid livell ieħor ta’ kollaborazzjoni strateġika fil-kompetizzjoni.
Ċiklisti tal-Mountain Bike Ta’ Esperjenza
Kemm Bonello kif ukoll Aquilina huma ismijiet stabbiliti fil-komunità sportiva Maltija, magħrufa għall-esperjenza vasta tagħhom fil-livell kompetittiv.
Bonello ilu involut fiċ-ċikliżmu Malti għal aktar minn għoxrin sena, fejn rebaħ diversi titli nazzjonali u għamel impatt f’kompetizzjonijiet internazzjonali.
Min-naħa tagħha, Aquilina kienet forza dominanti fiċ-ċikliżmu tan-nisa f’Malta, fejn kisbet bosta kampjonati nazzjonali u żammet prestazzjonijiet b’saħħithom u pożizzjonijiet fuq il-podju fil-livell internazzjonali.
Ma dawn se jieħdu sehem ukoll iċ-ċiklisti Stephen Grima u Brandon Sultana.
Preparazzjoni: Mediterranean Epic fi Spanja
Biex jippreparaw għal din il-kompetizzjoni monumentali, it-tnejn kienu qed jiffaċċjaw taħriġ rigoruż u ħadu sehem f’diversi kompetizzjonijiet ta’ livell għoli. Reċentament ħadu sehem fil-Mediterranean Epic, li saret f’Frar 2025 f’Oropesa del Mar – Castellón, Spanja.
Din it-tellieqa mifruxa fuq erbat ijiem, rikonoxxuta mill-UCI, hija meqjusa bħala waħda mill-aktar avveniment iebsa tal-pre season għal ċiklisti elite, b’rottot tekniċi, tlajja’ wieqfa, u terren varjat. Kompetizzjonijiet bħal dawn għinu lil Bonello u Aquilina jtejbu t-teknika u ssaħħu l-koordinazzjoni tat-tim, fejn setgħu jippruvaw l-istrateġija tat-tellieqa taħt kundizzjonijiet reali ta’ kompetizzjoni. Filwaqt li affrontaw avversarji ta’ klassi dinjija, kisbu għarfien imprezzabbli dwar is-saħħiet tagħhom u l-oqsma fejn jistgħu jitjiebu – elementi kruċjali biex iħejju ruħhom għall-isfidi fl-Afrika t’Isfel.
L-Absa Cape Epic
L-Absa Cape Epic hija l-aktar tellieqa prestiġjuża tad-dinja għal mountain biking fuq stadji, li tieħu tmien ijiem u tkopri madwar 608 kilometri, b’telgħat totali li jilħqu l-16,500 metru. L-isfida ssir fir-reġjun tal-Western Cape tal-Afrika t’Isfel u tinkludi korsa ġewwa artijiet privati, rottot wieqfa, u raba’ fejn isir fost l-inbejjed rinomati madwar id-dinja. Ir-rotta toffri veduti spettakolari flimkien ma’ sfidi inkredibbli.
Kull ġurnata, il-parteċipanti jkopru stadju differenti, u jivvjaġġaw minn proprjetà għal oħra. L-esperjenza mhix biss dwar it-tellieqa—hija avventura nomadika, peress li l-kompetituri jikkampjaw kull lejl f’post magħżul mill-organizzaturi. Fuq kollox, l-Absa Cape Epic hi prova vera ta’ reżiljenza, ħila, u saħħa mentali.
Bħala regola ġenerali ċ-ċiklisti jridu jikkompetu f’timijiet ta’ żewġ persuni u jridu jibqgħu fi żmien ta’ massimu ta’ żewġ minuti ‘l bogħod minn xulxin matul it-tellieqa kollha. Dan il-format uniku jeħtieġ kollaborazzjoni eċċellenti, appoġġ reċiproku, u deċiżjonijiet strateġiċi għaqlin. Il-kategorija Mixed fejn ser jikkompetu Bonello u Aquilina, iżid dimensjoni oħra, peress li jeħtieġ bilanċ fin bejn il-pass u l-immaniġġjar tal-enerġija.
“Is-snin ta’ esperjenza kompetittiva tagħna, flimkien mal-parteċipazzjoni reċenti tagħna fil-Mediterranean Epic, se jkunu imprezzabbli hekk kif niffaċċjaw l-isfidi estremi tal-Cape Epic. It-tellieqa tinkludi terren varjat, minn rottot fil-muntanji u imħarbta sa nżul tekniċi u tlajja’ li jirrikjedu enerġija kbira, li jeħtieġu kemm ħila kif ukoll reżistenza,” ikkummenta Bonello.
Pass Storiku għaċ-Ċikliżmu Malti
Il-parteċipazzjoni ta’ Bonello u Aquilina fil-Cape Epic hija aktar minn sfida personali—hija mument storiku għaċ-ċikliżmu tal-mountain biking Malti, hekk kif il-vjaġġ tagħhom juri l-ħila tal-atleti lokali li jilħqu u jikkompetu fil-livell dinji.
Dan il-vjaġġ sar possibbli grazzi għall-appoġġ ta’ diversi organizzazzjonijiet li jaqsmu l-passjoni tagħhom għall-dawn it-tip ta’ sfidi, fosthom Meerendal Wine Estate, Kalamba Games, Garmin, BBB Cycling, The Sports Medics, Go&Fun, Visit Malta. Il-parteċipazzjoni tagħhom hija wkoll appoġġjata mill-Kumitat Olimpiku Malti u SportMalta, kif ukoll mill-Malta Cycling Federation.
“Nisperaw li l-parteċipazzjoni tagħna tispira ċiklisti Maltin oħra, u turi li bi preparazzjoni xierqa u mentalità determinata, anke ċiklisti minn pajjiż żgħir jistgħu jikkompetu f’wħud mill-aktar kompetizzjonijiet iebsa fid-dinja,” ikkonkludiet Aquilina.
L-Absa Cape Epic tibda fl-16 ta’ Marzu u tintemm fit-23 ta’ Marzu.
