Wara l-ewwel ġurnata tat-tellieqa fl-Absa Cape Epic, Etienne Bonello u Marie Claire Aquilina kisbu s-14-il post fil-kategorija mixed li fiha ħadu sehem 73 tim – kisba impressjonanti meta wieħed iqis il-preżenza ta’ ċiklisti professjonali f’din il-kompetizzjoni.
Kif mistenni, it-terren iebes ikkaġuna xi ħsarat, fejn Bonello sofra puncture waqt it-tellieqa – fortunatament seta jkompli, iżda wara spezzjoni wara t-tellieqa nstabu xi xewk li kienu daħlu fit-tyre.
Il-kundizzjonijiet sħan u umdużi żiedu fl-isfida, u d-duo issa qed jieħu mistrieħ li jistħoqqilhom qabel it-tieni stadju iebes ta’ għada – rotta ta’ 92km li tinkludi 2,759m ta’ tlajja’.
L-Absa Cape Epic hija l-aktar tellieqa prestiġjuża tad-dinja għal mountain biking fuq stadji, li tieħu tmien ijiem u tkopri madwar 608 kilometri, b’telgħat totali li jilħqu l-16,500 metru. L-isfida ssir fir-reġjun tal-Western Cape tal-Afrika t’Isfel u tinkludi korsa ġewwa artijiet privati, rottot wieqfa, u raba’ fejn isir fost l-inbejjed rinomati madwar id-dinja.
Il-parteċipazzjoni ta’ Bonello u Aquilina fl-Absa Cape Epic qed issir grazzi għall-appoġġ ta’ Meerendal Wine Estate, Kalamba Games, Garmin, BBB Cycling, The Sports Medics, Go&Fun, u Visit Malta. Il-vjaġġ tagħhom qed ikun ukoll appoġġjat mill-għajnuna tal-Kumitat Olimpiku Malti u SportMalta, bil-kollaborazzjoni tal-Federazzjoni Maltija taċ-Ċikliżmu.
