Mosta għelbu lil Naxxar Lions bl-skor ta’ 2 – 0 biex b’din ir-rebħa u bid-draw fil-partita bejn Santa Lucia u Birkirkara huma irnexxilhom jsalvaw posthom fil-Kampjonat Premier Malti.
Għal din l-partita Naxxar wettqu sitt bidliet mill-11 li bdew fir-rebħa ta’ 4-0 kontra Valletta filwaqt li Mosta kellhom żewġ bidliet mid-draw ta’ 0-0 kontra Balzan. Jake Vassallo ta’ Mosta kien qed jiskonta partita ta’ sospensjoni.
Kif mistenni kienu Mosta li ħarġu mal-ewwel fuq l-attakk u wara biss żewġ minuti resqu viċin meta kien Zachary Brincat li tefa’ kross tajjeb u Henry Chidera Nwoga ra’ daqqa ta’ ras tiegħu taħbat mal-lasta u tgħaddi barra.
Fis-sittax il-minuta mill-ġdid kienu Mosta meta wara azzjoni ta’ freekick ta’ Ugochukwu, il-ballun eventwalment spiċċa għand Zachary Brincat li prova rovexxata minn tarf l-kaxxa li għaddiet ftit barra.
Fil 21 minuta għal darboħra kienu Mosta meta wara xogħol tajjeb ta’ Armen Hovhannisyan l-ballun spiċċa għand Willie Brito li ra ċans tiegħu jgħaddi barra. Tlett minuti wara u komplew Mosta meta kien korner dirett ta’ Nathan Agius li ħabat max-xibka minn barra.
Mosta meritatment marru fil-vantaġġ fil-45 minuta meta kien Nathan Agius li għadda ballun l-quddiem lejn Henry Chidera Nwoga li minn gol kaxxa tefa’ kross fil-baxx li ġie f’saqajn Zachary Brincat li b’xutt tajjeb tefa’ l-ballun fir-rokna tax-xibka u poġġa lill-Mosta fil-vantaġġ.
It-tieni taqsima bdiet b’ħafna logħob f’nofs il-ground li ma wassal għal ebda azzjoni denja ta’ nota tant li kellna nistennew sat-82 minuta sabiex giet innotata l-ewwel azzjoni perikoluża meta kien Armen Hovhannisyan li rċieva ballun u ra c-ċans tiegħu minn tarf l-kaxxa jispiċċa għoli.
Tlett minuti wara u Mosta għamlu l-iskor 2-0 meta kien Armen Hovhannisyan li ipprovda pass perfett lill-Gianluca Sciberras li b’xutt tajjeb tefa’ wara Andre Fenech biex kabbar il-vantaġġ għall-Mosta.
Fl-aħħar azzjoni tal-partita kienu Naxxar permezz ta’ Ito Yasukaze li kellu xutt minn ġol- kaxxa mdawwar f’korner mill-goalkeeper ta’ Mosta David Udoh Akpan.
Referee: Trtustin Farrugia Cann
BOV Plejer tal-loghba: – Zachary Brincat (Mosta)
