F’konferenza stampa li saret l-Ħamis, Mosta FC ħabbru diversi inizjattivi fosthom proġett ma’ klabb Niġerjan, l-sponsors il-ġodda kif ukoll il-miri għal dan l-istaġun.
Il-President tal-klabb George Galea ħabbar proġett interessanti bejn Mosta FC u Garden City Panthers FC li huwa klabb Niġerjan b’rabta mal-klabb mill-kapitali Taljana Roma FC. Plejers Niġerjani ser ikunu qed jingħataw esperjenza fil-Kampjonat Premier Malti qabel ma jkomplu bl-esperjenzi tagħhom ma’ klabbs oħra Ewropej.
Matul il-konferenza tkellem id-Direttur Tekniku tal-klabb Mosti Mario Muscat li fakkar li matul it-tlett snin li ilu jokkuppa l-kariga dejjem intlaħqu l-miri stabbiliti fosthom li tinħoloq struttura professjonali, l-introduzzjoni ta’ iżjed żgħażagħ kif ukoll li l-klabb jikkwalfika f’kompetizzjoni Ewropeja.
Il-Kap Eżekuttiv tal-PG Group Charles Borg qal li l-grupp jhossu onorat bil-kolobrazzjoni tagħhom ma’ Mosta FC u saħaq li sabiex l-sport jkompli jimxi l-quddiem, hemm bżonn li kulħadd jiġbed ħabel wieħed.
Apparti PAMA, Mosta FC ħabbru wkoll li Simply Clean huwa sponsor ieħor tal-klabb Mosti.
