Mosta kkonvinċew meta għelbu lil Marsaxlokk bl-iskor ta’ 3-2, b’din tkun it-tieni rebħa konsekuttiva għalihom wara dik ta’ 2-0 kontra Birkirkara li kisbu fi tmiem il-ġimgħa li għaddiet.
Kienet rebħa meritata għall-Mostin li pproduċew l-isbaħ logħob tul id-90 minuta, bix-Xlukkajri jippruvaw jiddettaw il-logħob tagħhom, iżda ftit li xejn irnexxielhom jagħmlu dan, b’din tkun it-tieni telfa konsekuttiva għalihom wara dik ta’ 1-0 li sofrew kontra Valletta.
Mosta għamlu l-intenzjonijiet tagħhom ċari mal-ftuħ tal-partita u wara biss ħames minuti, cross-shot tal-captain Zachary Brincat ġie interċettat mingħajr wisq diffikultá mill-goalkeeper ta’ Marsaxlokk, Marko Drobnjak.
Huma komplew jiddettaw il-logħob u fid-disa’ minuta fetħu l-iskor permezz ta’ xutt mill-ewwel fil-baxx ta’ CHRISTIAN NDUBISI NNAJ li ma ta l-ebda ċans lil Drobnjak.
U jidher li huma ma kinux kuntenti biżżejjed b’dan il-vantaġġ bikri fil-partita hekk kif minuta biss wara rduppjaw l-iskor permezz ta’ ZACHARY BRINCAT li b’xamma kbira għall-goal u b’opportuniżmu liema bħalu tefa’ ġewwa.
Iżda Marasaxlokk ma rmewx ix-xugaman anzi wettqu reazzjoni tajba u fil-21 minuta naqqsu l-marġni tal-iskor meta SUNDAY AKINBULE minn taħt il-lasta tefa’ ġewwa.
Madankollu, kienu Mosta li resqu viċin li jiskorjaw it-tielet goal fis-26 minuta meta l-awtur tal-ewwel goal, Christian Ndubisi Nnaj kellu x-xutt tiegħu minn tarf il-kaxxa jgħaddi ftit għoli.
Ix-Xlukkajri wieġbu fit-32 minuta permezz ta’ xutt mill-viċin ta’ Yuri De Jesus Messias li ntemm ftit barra.
Mosta skorjaw it-tielet goal fid-59 minuta meta wara li rċieva minn cross mix-xellug ta’ Clayton Failla, KEVIN TULIMIERI, kien fil-post it-tajjeb fil-mument opportun u permezz ta’ xutt mill-viċin tefa’ wara Drobnjak.
Ix-Xlukkajri wieġbu fil-71 minuta permezz ta’ freekick insidjuż ta’ Leandro Aguirre li ħareġ l-aħjar ta’ Akpan li salva b’diffikultá.
Mosta qalgħu daqqa ta’ ħarta fl-84 minuta, meta spiċċaw jilagħbu b’10 players meta tkeċċa għalihom il-player Damian Anei, wara li rċieva żewġ karti sofor fil-partita.
Marsaxlokk naqqsu l-marġni tal-iskor fid-90 minuta permezz ta’ daqqa ta’ ras mill-viċin ta’ SUNDAY AKINBULE, biex b’hekk irreġistra doppjetta personali.
Madankollu, Mosta xorta waħda baqgħu jamministraw il-vantaġġ minimu li kellhom sa tmiem il-partita.
Referee: Slobodan Petrovic
BOV Plejer tal-Logħba: Zachary Brincat (Mosta)
