Fic-Centenary Stadium is-Sibt filgħaxija Mosta ħarġu rebbieħa 2 -1 fuq Melita biex b’hekk għamlu ċert li fir-rawnd li jmiss huma jilgħabu mal-ewwel sitta.
Mosta ħarġu ferm aggressivi u wara biss erba’ minuti il-captain Clayton Failla kellu x-xutt tiegħu mid-distanza li ntemm ferm għoli. Melita wieġbu tliet minuti wara meta Penha da Costa avvanza tajjeb fil-kaxxa iżda t-tentattiv tiegħu kien blukkat minn difensur avvesrarju.
Fl-14-il minuta, Cutajar għal Melita ittanta xortih permezz ta’ xutt minn tarf il-kaxxa li ntemm ftit barra. Erba’ minuti wara Mosta fetħu l-iskor meta SUNDAY OKEREKE minn pożizzjoni ċentrali avvanza fil-kaxxa u żmarkat quddiem il-goalkeeper Gosef Mizzi ma ħafirx.
Iżda Melita wettqu reazzjoni mill-aqwa u fit-23 minuta ġabu l-iskor indaqs permezz ta’ ANDRE CARLOS PENHA DA COSTA li mix-xellug avvanza fil-kaxxa u għeleb ghal kollox lill-goalkeeper ta’ Mosta David Udoh Akpan.
Fis-27 miniua l-istess Penha da Costa dejjem għal Melita kellu x-xutt tiegħu li ntemm għoli. Huma komplew jippressaw u fit-38 minuta reġa’ kien Penha da Costa li tefa’ cross fil-baxx lejn Attard li kellu x-xutt tiegħu mblukkat minn difensur avvesarju.
Minuta biss wara Mosta reġgħu marru fil-vantaġġ meta NATHAN AGIUS, wara li rċieva l-ballun antiċipa lil difensur avversarju u b’eleganza tefa’ l-ballun fix-xibka. Żewġ minuti qabel tmiem l-ewwel taqsima, Jesus Andres Morlets għal Melita kellu x-xutt tiegħu li sab lil Akpan attent u dawwar tajjeb f’corner.
Fid-49 minuta, Mosta tilfu ċans tad-deheb li jiskorjaw it-tielet goal meta Nathan Agius minn pozżizzjoni ideali tefa’ barra. Fl-54 minuta, Melita kellhom ċans tajjeb permezz ta’ Morlets li kellu x-xutt tiegħu salvat tajjeb minn Akpan.
Il-partita kompliet tisbiehħu fis-67 minuta Okereke għal Mosta avvanza tajjeb fil-kaxxa iżda sab lil Mizzi attent li dawwar tajjeb f’corner.
Fil-ħin miżjud, Mosta ħolqu kontrattakk veloċi meta Aderigba għadda tajjeb lejn Fernandes li iżda kellu t-tentattiv tiegħu salvat tajjeb minn Mizzi, b’Mosta jkomplu jamministraw il-vantaġġ minimu li kellhom sa tmiem il-partita.
Referee: Slobodan Petrovic
Plejer tal-logħba: Nathan Agius (Mosta FC)
