Il-Ħadd filgħodu, bosta ingħaqdu ġewwa tas-Sliema għall-mixja, bl-iskop li titqajjem aktar kuxjenza dwar il-mard tal-kliewi. Dan propju fil-jum dinji li jitfa’ dawl fuq l-għarfien dwar is-saħħa tal-kliewi.
Il-mixja minn Tas-Sliema sal-Belt Valletta, saret bil-għan ukoll li tgħin lill-Transplant Support Group, grupp li joffri appoġġ u għarfien għall-pazjenti.
Tkellimna mal-President ta’ din l-għaqda u nurse, Josette Parnis, li appellat sabiex in-nies jirreġistraw bħala donaturi tal-organi.
“Il-pazjenti tar-renal ibatu għax fl-aħħar mill-aħħar, jiġu tliet darbiet fil-ġimgħa ta’ kuljum, sakemm ma jagħmlux trapjant, u nkunu dejjem magħhom ftit ftit. Min għadu ma nkitibx bħala organ donor, jinkiteb, fl-aħħar mill-aħħar dan huwa ġest nobbli u wara mewtna fl-aħħar mill-aħħar, tagħti ħajja lill-ħaddieħor.
Tkellmet magħna wkoll, Paulette Gafa’, personalita’ sinonima għall-umoriżmu tagħha.
Minkejja dan, hija qasmet magħna l-esperjenza u t-tbatijiet li għaddiet minnha l-familja tagħha, meta ommha mardet bil-kliewi u aktar tard tilfet ħajjitha.
“Meta tkun relative ta’ renal patient, tarahom ibatu, ibatu ħafna fis-silenzju u inti ma tista’ tagħmel xejn. Jien illum ħa nkun qed nimxi din il-mixja flimkien ma’ sħabi u wkoll mat-transplant group, biex infakkar l-ommi li mietet xahar ilu, b’din il-kawża, l-ommi ma nistax inġibha lura, imma bl-għajnuna li nista’ nagħmel ħajja aħjar ta’ pazjenti bħal ommi u oħrajn, nibqa’ nagħmel din il-kawża f’isem ommi.”
Carmelo Fenech, pazjent tar-renal, tkellem magħna wkoll dwar l-isfidi li jġib miegħu il-mard tal-kliewi.
“Ġejt il-mixja llum biex inkun ta’ solidarjetà mal-kollegi tiegħi, dawk li huma wkoll morda bil-kliewi. Tgħidli ħa timxi? Mhux se nagħmel mixja fuq saqajja, għax bl-effett tal-kliewi nqatawli s-swaba ta’ saqajja. Allura għandi l-mutur u xorta ħa nakkompanja lill-kollegi tiegħi f’din il-mixja.”
Intant, dawk li jixtiequ jirreġistraw bħala donaturi tal-organi, għandhom jagħmlu dan permezz tas-sit organdonation.gov.mt jew jiġbru l-formola tal-applikazzjoni tad-Donazzjoni tal-Organi minn kwalunkwe Ċentru tas-Saħħa.
