Mitt jum ilu l-poplu għażel li jħares lejn il-futur sabiħ ta’ pajjiżna.
Il-poplu Malti u Għawdxi ddeċieda u ta l-akbar mandat b’saħħtu lill-Partit Laburista u lill-Prim Ministru Robert Abela fl-istorja ta’ Malta sovrana.
Dakinhar li rebħet Malta Flimkien, il-Prim Ministru mill-ewwel ta sinjal qawwi li l-umiltà u aktar ħidma se jkunu l-qofol ta’ dan il-Gvern li kien għadu kif ġie elett.
“Il-poplu wera bis-saħħa li għandu fiduċja f’pajjiżna u li jrid jibqa’ miexi ’l quddiem. Din il-fiduċja b’saħħitha rridu nrodduha lura f’ħafna umiltà u f’ħafna iktar ħidma Inwegħidkom ħafna iktar ħidma minn qalbi.”
il-Prim Ministru Robert Abela
L-għada li l-Prim Ministru għamel dan l-indirizz, quddiem baħar ta’ nies li fih spikkaw l-ilwien bojod u ħomor, Dr Robert Abela flimkien mal-għeżież tiegħu, Dr Lydia Abela u binthom Giorgia Mae, mar il-Palazz tal-President, il-Belt. Hemmhekk għamel patt mal-poplu u ħalef li se jkun qed imexxi bl-aħjar mod lil dan il-pajjiż.
In-nies entużjasti jaraw il-Mexxej tagħhom, li bil-mixi mbagħad qabad it-triq lejn Kastilja, l-Uffiċċju li minnu jieħu tant deċiżjonijiet importanti anki waqt sfidi kurrenti.
F’dawn l-ewwel mitt jum, il-wegħdiet li saru biex ikunu mwettqa f’dawn it-tliet xhur u ftit iżjed ilkoll twettqu.
Huwa preludju għall-ħidma ma taqta’ xejn tul leġiżlatura li matulha l-Gvern immexxi minn Robert Abela, mal-ewwel ta sinjal ċar li dak li jwiegħed, iwettqu.
“Ejja nkomplu dan il-vjaġġ flimkien! Dan hu vjaġġ fejn ma nkunux wasalna qabel kull ċittadin iħossu apprezzat u rispettat. Din se tkun l-attitudni tal-gvern immexxi minni fil-ħames snin li ġejjin. Legalment, il-ġurament li ħadt illum huwa ħalfa fuq il-Kostituzzjoni, imma f’qalbi u f’moħħi huwa l-kelma li għamilt magħkom, li tajt lilkom, biex immexxi għalikom, Għawdxin u Maltin. Flimkien. Il-futur sabiħ.”
il-Prim Ministru Robert Abela
F’mitt jum li fihom Gvern ġdid kompla jwieżen lill-familji bi stabilità fil-prezzijiet tal-enerġija u tal-fjuwil, Robert Abela żamm mal-wegħdiet li għamel.
Il-liġi tal-IVF biex aktar persuni jħaddnu tarbija u jsiru ġenituri f’pajjiżna stess, issa għaddiet mill-Parlament.
L-art fiż-Żonqor u oħra f’Bormla se jerġgħu jingħataw lura lin-nies u l-femiċidju daħal fil-Kodiċi Kriminali tal-pajjiż.
Malta ġiet deskritta wkoll bħala storja ta’ suċċess wara li implimentat il-pjan ta’ azzjoni maqbul mal-FATF.
Pajjiżna kompla jattira investiment, bħal dak tar-Ryan Air.
Għoxrin miljun ewro f’faċilità għat-tiswija tal-ajruplani li se toħloq mitejn u ħamsin impjieg.
L-ekonomija kompliet tirċievi ratings u ċertifikati b’saħħithom. Is-settur turistiku wkoll beda juri sinjali qawwija ta’ rkupru u ċ-ċifri bdew jersqu iżjed lejn dawk ta’ qabel il-pandemija.
Fuq kollox, il-Prim Ministru dejjem saħaq li l-ħidma ma tistax tieqaf hawn; anzi, fadal iżjed xi jsir.
Anki f’laqgħat li kellu ma’ mexxejja dinjin f’dawn l-ewwel mitt jum, imbotta l-pożizzjoni ta’ Malta, pajjiż ċkejken li, iżda għandu leġittimità biex jisħaq fuq il-paċi u d-djalogu f’Ewropa li, fuq l-għatba tagħha, għandha gwerra.
Bħala l-Prim Ministru ta’ Malta, Robert Abela baqa’ wkoll jaċċenna mal-Ewropej li l-piżijiet li ġejjin mil-isfidi kurrenti ma għandhomx jintefgħu fuq iċ-ċittadini.
Dan apparti li kompla jħares lejn l-isfida tat-tibdil fil-klima bħala waħda importanti biex nindirizzawha flimkien.
F’Malta hawn għatx għal iżjed spazji miftuħa għat-tgawdija mill-familji, u l-Gvern Laburista għandu pjan ċar, b’investiment ta’ seba’ mitt miljun ewro fuq medda ta’ seba’ snin, biex ikun hawn iżjed spazji miftuħa, saħansitra fil-komunità.
Mitt jum li fihom twettqu l-ewwel wegħdiet.
Mitt jum ta’ ħidma u deċiżjonijiet.
