https://www.facebook.com/abelacarmelo/videos/423822278566638/?t=66
Fis-seduta tal-Parlament b’diskussjoni fuq il-Baġit tal-Gvern 2020, estimi tal-finanzi, Ministeru għall-Affarijiet Barranin u l-Promozzjoni tal-Kummerċ, il-Ministru Carmelo Abela ħabbar li, “l-aspirazzjoni hi li Trade Malta tkompli tikber. Is-sena d-dieħla se nibdew bl-ewwel esperiment bħala commercial attachés. Dawn ser ikunu persuni b’miri speċifiki fejn ser ikunu stazzjonati ma missjonijiet diplomatiċi Maltin barra ‘l pajjiż identifikati, bħala proġett pilota”.
Żied jgħid li huwa infurmat li Trade Malta, fl-aħħar sena, offriet iżjed minn 600 mitt elf ewro f’sussidji lil madwar 100 kumpanija sabiex ikunu jistgħu jipparteċipaw f’fieri barra ‘l pajjiż. Hawn huwa saħaq fuq l-importanza li l-Ministeru qed jagħti fil-qasam tal-Promozzjoni tal-Kummerċ sabiex ikompli jgħin il-komunita’ kummerċjali Maltija tikseb suċċess barra ‘l pajjiż.
F’dan l-ambitu, l-Ministru Abela tkellem kif illum il-ġurnata id-diplomazija tmur lill’hinn minn dik tradizzjonali li tara politika bilaterali u multilaterali bejn pajjiżi differenti u li llum din tinkludi wkoll id-diplomazija kummerċjali. Semma’ l-ħidma li qed issir ma diversi pajjiżi kemm mill-Ministeru u anke minn Trade Malta permezz ta’ seminars Malta u anke trade delegations barra minn Malta. Fosthom dan qed isir mal-Ġappun, Bangladexx, Singapor, Iżrael, Korea t’Isfel, Indja. Dan bil-għan li inkomplu inwessgħu l-opportunitajiet kummerċjali għall-intrapriżi Maltin. Qal lis-sena d-dieħla l-aspirazzjoni tal-Ministeru hi li jkun hemm trade delegations lejn il-Ghana, Etjopja, Rwanda, Kosta tal-Avorju. Ser ikun hemm ukoll trade delegation fil-Lvant Nofsani.
“Ir-riżorsi umani huma l-qofol ta’ dan il-Ministeru li qed jikber”, irrimarka Abela. Hawn huwa tkellem kif il-Ministeru jixtieq jattira iżjed diplomatiċi sabiex jaħdmu mal-Ministeru tal-Affarijiet Barranin. “Matul din is-sena diġa kellna żewġ sejħiet. M’inix kuntent bin-numru ta’ nies li applikaw. Iffirmajna ftehim kollettiv sabiex mhux biss, biex nagħtu iżjed dinjita’ lil min hu diġa fil-korp diplomatiku, iżda sabiex inħajru iżjed żgħażagħ sabiex iħarsu lejn dan il-Ministeru bħala karriera. Għall-ewwel darba permezz ta’ ftehim kollettiv li seħħ wara 25 sena, saħħaħna l-kundizzjonijiet tax-xogħol kemm fejn jidħol rikonoxximent finanzjarju inkluż għall-ewwel darba lil dawk li jservu fil-Head Office hawn Malta u kemm fejn tidħol il-livell ta’ promozzjonijiet”, qal Abela. Huwa sostna kif dan huwa xogħol sensittiv li jsir kemm mill-Head Office f’Malta u anke fit-37 missjoni diplomatika madwar id-dinja fejn id-dover hu li jiġi protett l-interess ta’ Malta.
Il-Ministru Abela, semma’ kif il-missjonijiet diplomatiċi barra ‘l pajjiż ukoll qed jingħataw iżjed riżorsa umana biex isaħħu s-servizzi konsolari tagħhom. Semma’ fost l-oħrajn il-każ tal-Ambaxxata ta’ Geneva, Irlanda, Ankara, Stati Uniti tal-Amerika- New York li kollha ingħataw uffiċjali ġodda sabiex jgħinu l-Ambaxxatur li f’ċertu każi kien qed iservi waħdu. “Il-pożiżżjoni ċara hija ċara li ma jistax ikollna Ambaxxatur iservi waħdu biss”, qal l-Onor Abela.
Huwa innota kif dan il-Ministeru qed iżid il-missjonijiet diplomatiċi madwar id-dinja li għaldaqstant jeħtieġilhom iżjed riżorsa umana. Tkellem fuq il-ftuħ ta’ missjoni diplomatika fil-Ghana, Afrika, il-ħidma biex jiġi identifikat post għall-ftuħ ta’ ambaxxata f’Tokyo, Asja, u d-direzzjoni politika sabiex tinfetaħ ambaxxata fl-Amerika t’isfel. Hawn huwa innota li l-Kabinett għadu qed jiddiskuti l-aħjar pajjiż fejn tista tinfetaħ din l-ambaxxata.
Il-Ministru Abela semma’ wkoll l-importanza tat-taħriġ fid-diplomazija. Innota fuq il-kollaborazzjoni li hemm għaddejja mal-Ministru tal-Affarijiet Barranin Żvizzeru sabiex fix-xhur li ġejjin issir il-bidla li hemm meħtieġa għal futur aħjar għal MEDAC – (Mediterranean Academy of Diplomatic Studies). Hawn huwa semma’ li apparti finanzjarjament mill-Gvern Żvizzeru u anke dak Ġermaniż, għaddejja ħidma biex iżjed pajjiżi jiġu imħajra jinvestu f’din l-Akkademja.
Fid-diskors tiegħu il-Ministru Abela ta’ wkoll rendikont fuq il-ħidma tal-Ministeru responsabbli mill-Affarijiet Barranin fejn tidħol il-Brexit, il-Commonwealth, il-Frankofonija li Malta issieħbet fiha fl-aħħar sena bl-istatus ta’ osservatur. Qal li l-Ministeru jagħti attenzjoni partikolari lill-Mediterran inkluż is-sehem taż-żgħażagħ sabiex tiġi ifformulata l-politika tal-Mediterran għaż-żmien li ġej.
Semma’ kif fejn tidħol in-Nazzjonijiet Magħquda Malta kellha kuntatt ma iżjed minn 100 pajjiż. Qal ukoll kif fl-aħħar sena Malta iffirmat iżjed minn 30 ftehim bilaterali ma pajjiżi differenti għall-ġid tal-poplu Malti, fosthom maċ-Ċina, Ghana, Tuneżija, Awstralja, Alġerija, Mongolia, Ċili, Ukrajna, Armenja, Eġittu, Iżrael u Bangladexx.
Il-Ministru Abela tkellem ukoll fuq l-isfida tal-immigrazzjoni. Hawn huwa semma’ kif Malta qed tħares lejn il-kontinent Afrikan bħala trade partner. Huwa appella lill-membri stati tal-Unjoni Ewropea sabiex ikomplu jħarsu lejn dan il-kontinent bħala sieħeb kummerċjali. Tkellem li sabiex wieħed jindirizza l-isfida tal-immigrazzjoni, wieħed irid iħares lejn l-iżvilupp ta’ dawn il-pajjiżi sabiex ikun hemm il-paċi u l-istabbilta’ f’dawn il-pajjiżi. Qal kif Malta bir-riżorsi tagħha permezz tal-Official Assistance Devoplment Fund qed tagħmel il-parti tagħha biex tagħti opportunita’ b’mod partikolari lil żgħażagħ f’dawn il-pajjiżi biex jinħolqu opportunitajiet ta’ edukazzjoni, ta’ xogħol u tkabbir ekonomiku.
Il-Ministru Abela semma’ wkoll it-tibdi fil-klima u l-isfidi ekonomiċi li din qed tpoġġi fuq il-pajjiż speċjalment l-Istati Żgħar. B’sodisfazzjon fakkar kif għall-ewwel darba, din is-sena Malta laqqgħat madwar l-istess mejda l-Ambaxxaturi tal-Oċeani flimkien man-Nazzjonijiet Magħquda, Commonwealth u l-Kummissjoni Ewropea. “Se naħdmu biex tkompli titqajjem iżjed kuxjenza u azzjoni fuq dan is-suġġett”, qal l-Onor. Abela.
Tkellem ukoll kif fejn tidħol il-kandidatura Maltija għal-siġġu fil-Kunsill tas-Sigurta’ tan-Nazzjonijiet Magħquda 2023-2024, Malta se tkun qed tvara l-kampanja tagħha b’mod uffiċjali f’Ġunju 2020.
Abela tkellem ukoll fuq is-sitwazzjoni fil-Libja. Appella lill-pajjiżi madwar id-dinja, biex ma jieħdux inizzjattivi sabiex ifixklu, iżda għandhom jagħtu l-appoġġ tagħhom lin-Nazzjonijiet Magħquda sabiex tinkiseb l-istabbilta’ u l-paċi fil-Libja. Appellalhom ukoll biex josservaw il-liġi tal-arms embargo tan-Nazzjoniet Magħquda, jiġifieri ir-restrizzjonijiet fejn jidħlu l-użu tal-armi.
Fejn jidħol il-Lvant Nofsani huwa qal kif wasal iż-żmien kif l-Unjoni Ewropea bħala blokk flimkien mal-Istati Uniti tal-Amerika għandha tieħu iżjed leadership, għal paċi fil-Lvant Nofsani.
Il-Ministru aċċenna wkoll għad-dijaspora Maltija. Semma’ kif il-linja tal-ħsieb hija li Malta tkompli iżżomm relazzjoni mal-Maltin li jgħixu barra u kif tista tiżviluppa relazzjoni aħjar mar-4 u l-5 ġenerazzjoni u kif dawn jistgħu jibqgħu iżommu interess f’Malta. Hawn semma’ l-proċess li ser ikun jinkludi l-emendar tal-liġi tal-Maltin li jgħixu barra. “Infurmat li hemm iżjed minn miljun Malti f’madwar 180 pajjiż madwar id-dinja”, qal Abela. Dan filwaqt li rringrazzja lis-servizzi konsolari li qegħdin hemm bħala appoġġ lil dawn il-Maltin.
Il-Ministru Abela ikkonkluda billi semma’ kif bħala pajjiż newtrali, il-politika barranija ta’ Malta se tibqa’ bbażata fuq id-djalogu u l-promozzjoni tal-paċi u Malta qatt mhu se tkun favur azzjonijiet militari għal sitwazzjonijiet partikolari.
