Dan huwa Simon Callus, missier ta’ erbat itfal: tliet subien u tifla. Ta’ għaxar snin beda bl-alkoħol. Ħames snin wara, bela’ l-ewwel ecstasy waqt festin. Kien ħabib tiegħu li kien qabbdu t-triq għal dan il-vizzju. Wara dan il-party, Simon ipprova l-eroina miegħu għall-ewwel darba. Żmien wara, mess il-kokaina mal-eroina.
Sitt snin ilu beda relazzjoni mal-mara li għandu llum. Kienu ltaqgħu waqt xi gruppi li kienu qed jagħmlu waqt programm ta’ rijabilitazzjoni fi ħdan il-Caritas Malta. Sfortunament, wara xi żmien reġgħu waqgħu fil-vizzju. Madankollu, kien hemm mument f’ħajjet Simon meta ddeċieda li jibdel it-triq li kien qabad.
Qal, “Il-katalist kienet il-mara tiegħi, li kienet tqila waqt li konna għadna qed nużaw. Ħin minnhom ħarist lejn żaqqha u għedt, ‘Ma nistgħux nibqgħu għaddejjin hekk’. U għidtilha, ‘Għada se nagħmlu l-pass’. Minn dak iż-żmien m’erġajtx użajt darb’ oħra; qtajt kollox. Illum il-ġurnata qtajt kollox. Clean mid-droga, clean mill-alkoħol, clean mis-sigaretti. Kont bżajt li jeħduli tifel ieħor, u li kieku kont nibqa’ għaddej f’dik it-triq, hekk kien jiġri, u hekk kellhom jagħmlu. Għax Allaħares ma kienx hekk, għax kienu jitrabbew f’ambjent mhux tajjeb.”
Ħajjet Simon Callus ma kienet qatt ward u żahar. Bħal kulħadd, kellu ħafna nżul u tlajja’. Il-ħajja dewqitu diversi sfidi u weġgħat. Qrabatu għexu l-kalvarju miegħu. Għamel affarijiet li ddispjaċih li wettaqhom.
Qal, “L-ikbar dispaċir li għandi mhux li batejt jien, għax jien batejt bi ħtija tiegħi. L-ikbar dispjaċir tiegħi li batew it-tfal miegħi u l-familja tiegħi. Minn hawn niskuża ruħi ma’ kull minn weġġajt fit-triq, għax weġġajt ħafna nies, speċjalment lit-tfal. It-tfal tiegħi batew ħafna, tal-partner ukoll. Is-sena l-oħra t-tfal tagħha tilfu lil missierhom permezz tal-vizzju tad-droga; miet b’overdose. Din it-triq tħalli ħafna vittmi.”
Vittmi wkoll kienu l-ġenituri tiegħu.
Qal, “Weġgħa kbira oħra li għandi kemm weġġajt lill-ġenituri. Sraqthom. Illum, li jiena missier u nħoss imħabba lejn it-tfal, lanqas nimmaġinani x’saħħa jrid ikollok biex ikollok lit-tfal tiegħek f’dik it-triq u tibqa’ għaddej. Ommi u missieri huma l-aktar tnejn min-nies li nammira fid-dinja għas-saħħa straordinarja li għandhom. Kienu ilhom tliet snin ma jkellmuni, għax dak kien hemm bżonn. Kellhom ikunu naqra ebsin miegħi biex jiena finalment nirrealizza li qed nitlef kollox madwari.”
Kien hemm żmien li ħajtu kienet bejn sema u ilma. Kienet f’xifer irdum. Kien tilef kollox.
Qal, “Jien tlift kollox. Jien tlift lit-tfal, tlift lill-ġenituri, tlift saħħti – għax kont bil-griżma tal-morda darbtejn l-isptar minħabba l-użu tad-droga, overdose ukoll. Però, ommi u missieri llum qegħdin hawn miegħi, ikellmuni, iħobbuni. Inħobbhom ħafna u minn hawn ngħidilhom sorry ta’ kemm weġġajthom u ta’ kemm għamiltilhom ħsara, imma l-Bambin kbir, għadni hawn u nagħmilhom proud bija.’
Simon Callus iħares lejn il-ġejjieni b’ottimiżmu u altruiżmu lejn ħaddieħor. Erba’ xhur oħra se jibda kors l-Università.
Qal, ‘Se nibda kors ta’ residential day care f’Ottubru. Se nagħmel il-kors għax jinteressani li ’l quddiem nibda naħdem f’dan il-qasam, biex ngħin nies li għaddejjin mill-problema bħali. Bħalissa wkoll qisni nittrenja lili nnifsi u nagħti minn dak li jiena ħadt. Niġi nagħmel darbtejn fil-ġimgħa, ‘giving back’. Nagħmel grupp lir-residenti ta’ San Blas u nagħmel grupp lir-residenti tax-xelter. Hekk huma qishom jaraw lili, li jafuni kif kont u kif qiegħed issa, u dik tagħmlilhom dik in-naqra kuraġġ. Jgħidu, ‘La wasal dal-bniedem, m’għandna xejn inqas minnu, nistgħu naslu aħna wkoll’.”
