Minn tal-inqas 24 persuna jmutu minħabba xita qawwija fl-Indja

Minn tal-inqas 24 persuna mietu kawża ta’ għargħar fin-Nofsinhar tal-Indja, wara li xita qawwija kkawżat numru ta’ xmajjar biex ifuru.

Fost dawk li tilfu ħajjithom hemm ħamest itfal.

Huwa maħsub li n-numru ta’ fatalitajiet ikompli jiżdied minħabba l-fatt li għad hemm għexieren irrapportati nieqsa. Filwaqt li eluf ta’ persuni diġà ġew evakwati.

Numru ta’ djar spiċċaw inġarru mill-ilmijiet, kif ukoll xi passiġġiera ġew salvati hekk kif il-karozza tal-linja li kienu fuqha mtliet bl-ilma.

Ħelikopters militari qed jintużaw biex iwasslu provvisti lil dawk li jinsabu maqbuda.