Il-fergħa tal-Partit Laburista iDEAT organizzat it-tieni diskussjoni minn sensiela ta’ erbgħa, bit-tema STIGMA, din id-darba ffukata fuq il-persuni LGBTIQ+.
Din l-attivitá kienet indirizzata minn diversi kelliema, fosthom Aaron Giardina, riċerkatur fil-qasam tad-drittijiet ta’ persuni LGBTIQ+ u l-ħaddiema tas-sess; Noel Vella Galea, l-awtur tal-blog TwoPapasMalta u membru tar-Rainbow Family Network; u Antonella Bugeja, riċerkatriċi dwar in-newroxjenza u membru tal-għaqda LGBTI+ Gozo.
Vella Galea rrefera għall-istigma u l-kummenti li jaffaċjaw hu u żewġu, għaliex addottaw żewġ ulied.
Min-naħa l-oħra, Giardina semma n-nuqqas ta’ informazzjoni li g]ad hemm fost it-tobba dwar il-persuni LGBTIQ+.
Antonella Bugeja saħqet fuq il-bżonn li nedukaw lis-soċjetà għax il-preġudizzju fuq il-komunita’ LGBTIQ+ ħafna drabi jseħħ minħabba nuqqas ta’ informazzjoni.
Tkellmet ukoll is-Segretarju Parlamentari għar-Riformi u l-Ugwaljanza, Rebecca Buttigieg, li qalet li l-Gvern se jniedi l-Equality Bill fiż-żmien li ġej.
Min-naħa tiegħu, il-Membru Parlamentari Randolph Debattista semma d-diffikultajiet li jsibu persuni LGBTIQ+ biex iħossuhom komdi jesprimu l-identità tagħhom fil-qasam sportiv.
Anki rappreżentanti minn diversi għaqdiet tkellmu dwar l-istigma fil-konfront tal-persuni LGBTIQ+, fosthom Nicholas Bugeja mil-għaqda ARC. Huwa appella biex nies b’influwenza qawwija fuq is-soċjetà jkunu iktar attenti fil-kummenti tagħhom dwar il-liġijiet f’dan l-ambitu.
Oriana Farrugia, uffiċjal tal- iDEAT u l-moderatriċi tad-diskussjoni matul din is-serata, esprimiet il-bżonn t’attivitajiet bħal STIGMA sabiex il-każijiet kurrenti dwar kif is-soċjeta’ taffettwa lil nies LGBTIQ+ fil-ħajja ta’ kuljum, jaslu b’mod ċar għand in-nies li jsegwu tali diskussjoni.
Mikela Abela miż-Żgħażagħ Laburisti semmiet il-benefiċċji tal-kampanja ‘INDAQS’, li l-fergħa bdiet f’ Settembru.
L-attività li jmiss se ssir nhar it-Tnejn 28 ta’ Novembru fis-6pm, din id-darba dwar l-iSTIGMA marbuta mas-saħħa mentali.
Dawn id-diskussjonijiet qed isiru fl-Ispazju Kreattiv, il-Belt Valletta.
