Il-Ħamis, b’vot ta’ 5 kontra 4, il-qorti ċaħdet l-appell ta’ Donald Trump fi sforz aħħari sabiex jittardja s-sentenza li se tingħatalu llum fil-każ ta’ tixħim ta’ flus biex jinxtara s-silenzju, għaxart’ijiem biss qabel jieħu l-ġurament bħala President tal-Istati Uniti għat-tieni darba.
L-Imħallef Juan Merchan diġa ddikjara li mhux se jkun qed jagħti piena ta’ ħabs, iżda madanakollu din is-sentenza se tkun tfisser li Trump se jkun l-ewwel President li se jidħol fil-kariga b’pedina kriminali fuq il-kondotta uffiċjali tiegħu.
Il-prossimità ta’ din is-sentenza u l-inawgurazzjoni ta’ Trump hija kuntrastanti hekk kif l-imputat se jkun suġġett għall-awtorità ta’ imħallef u verdett ġudizzjarju ftit jiem biss ’l bogħod minn meta se jassumi l-poteri tal-presidenza u għalhekk il-gwardjan tal-liġijiet u l-Kostituzzjoni tan-nazzjon.
Il-frażi ‘bla preċedent’ intużat kemm-il darba matul l-intriċċi kollha fil-ħajja ta’ Trump inkluż il-kampanji presidenzjali u l-ewwel terminu tiegħu fil-White House, iżda din żgur se tkun imniżżla bħala parti mill-istorja, hekk kif b’diversi kampanji rnexxielu jaħrab minn erba’ akkużi kriminali u jirbaħ it-tieni terminu biex imexxi l-Istati Uniti.
Skont rapporti fil-midja, Donald Trump mhux se jkun preżenti fi New York fl-istess qorti fejn kien ġie kkundannat is-sena l-oħra, iżda se jkun qed isegwi virtwalment minn daru fi Florida.
