- IL-PARTITARJI TAL-PN F’BAĦAR TA’ INKWIET
Partitarji tal-Partit Nazzjonalista jinsabu f’baħar ta’ inkwiet imnikkta b’dak li għaddej minnu l-partit inqas minn xahrejn wara li għażel Kap ġdid. Ma jifilħux iktar għal dak li qed iseħħ quddiem għajnejhom, minn dawk li appoġġjaw biex telgħu fil-Parlament, fil-konfront ta’ dak li appoġġjaw biex isir Kap. Frustrati bis-sitwazzjoni li jinsabu fiha qed jiżvogaw fil-programmi ta’ Radio 101, u l-messaġġi huma ċari. Jafu x’inhu għaddej u lil min qed jisfida jgħidulu jitlaq. Oħrajn qed isejħu għall-medjazzjoni, fosthom tal-eks Prim Ministru Lawrence Gonzi. Filwaqt li hemm min lil dawn in-nies qed jgħidilhom jieqfu għax Delia qiegħed hemm biex ikun ikkritikat. Għax fuq kollox dik hi d-demokrazija.
Li hu żgur hu li l-qtil ta’ Daphne Caruana Galizia ħoloq konfużjoni fil-partit.
F’uħud minn ħafna interventi fuq Radio 101 intqalu dawn id-dikjarazzjonijiet. “Naqbel 150% mal-ewwel persuna li tkellmet dwar l-inkwiet li qed jipprovaw jaqilgħu, mhux kif għidt int, nies minn barra l-partit, imma nies minn ġol-partit,” qal wieħed mis-semmiegħa li għamilha ċara li ma jaqbel xejn mal-preżentatriċi li provat tnaqqas mis-serjetà tas-sitwazzjoni.
Oħrajn, li ċwieċ mhumiex, qalu li jekk vera mhumiex kontra Delia d-deputati għandhom jagħmlu dikjarazzjoni ta’ fiduċja fil-Kap.
“Se nibqgħu sejrin biha? Għalfejn ma ssirx dikjarazzjoni li mhux veru mid-deputati, ħalli n-nies ma jibqgħux sejrin biha?” qalet semmiegħa oħra li nstemgħet imweġġa’ b’dak li għaddej.
Kien hemm imbagħad min kellu messaġġ ċar lejn Simon Busuttil. Itlaq. “Mhux għamilha ċara li mhux beħsiebu jieħu parti fl-elezzjoni ta’ kap tal-partit u se jibqa’ hemm. Inħallu lil Kap tal-partit il-ġid Adrian Delia jaħdem għalina. Nies minn ġewwa tal-partit qed ifarrku l-partit,” qal semmiegħ ieħor.
“Adrian Delia tela’ b’vot demokratiku. Mela allura issa noqogħdu ngħidu fuq id-demokrazija. Din ħsara lill-partit. Misshom jagħmlu stqarrija li mhux veru,” reġa’ insista xi ħaddieħor.
“Ma noqogħdux ngħidu dawn qlajjiet. Din hija verità. Jien nagħmel challenge lil min hu msemmi fil-gazzetti. Jew joħroġ stqarrija li mhux veru jew jagħmel libell. Jien wieħed minn dawk li se nibdew inċemplu n-nies u nistaqsihom intom x’se tagħmlu? Jew ma’ naħa jew oħra,” qal semmiegħ ieħor b’oħrajn iċemplu biex jaqblu miegħu. Filwaqt li semmiegħ ieħor kellu appell ċar: “Ngħid lill-kandidati li ħarġu u ma telgħux, tibqgħux tagħmlu ħsara. Li kieku ridukom in-nies kienu jtellgħukom.”
Iżda, mhux kulħadd jaqbel. “Għax il-Kap tela’ demokratikament noqogħdu kulħadd wara dak il-kap. Il-Prim Ministru tela’ demokratikament u l-ħażin jibqa’ ħażin. Dellijiet fuq il-kap hemm, jiena tesserat u vvotajt. Il-ħaġa li nikkritikaw lil min jikkritika l-kap ħażin huwa ħażin minnu nnifsu,” qal tesserat li b’vuċi edukata spjega għaliex ma jaqbilx ma’ sħabu.
Oħrajn kienu mwaqqfa milli jagħmlu l-intervent tagħhom għax ma felħux ma jattakkawx lil Simon Busuttil.
“Jien għandi rispett lejn Dr Busuttil. Biss ħsara qegħdin jagħmlu u jekk trid ngħidlek l-ismijiet. Kienu Membri Parlamentari li tlabthom kif nistgħu nagħmlu biex nagħqdu l-partit. Ir-risposta kienet li mhux lesti. Lesti biex jagħmlu ħsara lill-Kap. Għidtilhom dak għażilnieh aħna,” qalet persuna oħra.
Quddiem dan kollu ċempel xi ħadd jitlob medjazzjoni.
“Robert Cutajar please. Int għandek fiduċja kemm minn Laburisti u kemm minn Nazzjonalisti. Hemm ċans tressaq lil Lawrence Gonzi jkun medjatur?” staqsa xi ħadd. “Ovvjament jien ma stennejtx din id-domanda,” qal Cutajar li bħal fuq ir-radju prova ma jidħolx bejn il-basla u qoxritha.
Imbagħad tkellmu oħrajn iktar determinati. Saħqu li l-Partit ikbar minn kulħadd u min irid jitlaq, jitlaq. Għax il-Partit diġà nqasam fl-imgħoddi, qal dan is-semmiegħ, u kien baqa’ jgħix biss l-istess Partit Nazzjonalista. Kif kien seħħ ukoll fil-Partit Laburista.
“Aħna għażilna kap xahar ilu u mhux se nirrispetawh? Jekk hemm min irid jaqsam il-partit jaqsmu. Jekk għandhom jitilqu jitilqu,” qal determinat semmiegħ ieħor. Li kellna niktbu dwar kull telefonata li daħlet f’dan is-sens nimlew paġni sħaħ.
