L-aħbar li Malta kisbet eżenzjoni mill-impenn li ntrabtu bih l-Istati membri tal-Unjoni Ewropea biex inaqqsu l-użu tal-gass bi ħmistax fil-mija ntlaqgħet tajjeb ferm minn sħab soċjali f’pajjiżna, li ddiskrivew dan bħala pass lejn id-direzzjoni t-tajba.
ONE News tkellem ma wħud mis-sħab soċjali, li esprimew is-sodisfazzjon tagħhom għall-ħidma tal-Gvern fil-livell tal-Unjoni Ewropea, sabiex kull faxxa fis-soċjetà Maltija tkun protetta mill-isfidi internazzjonali.
Is-Segretarju Ġenerali tal-General Workers’ Union, Josef Bugeja, qal li dan il-ftehim ifisser li l-ħaddiema m’għandhomx lok għall-allarm li l-prezzijiet tal-enerġija se jiżdiedu minħabba dan l-obbligu mill-Unjoni Ewropea.
Spjega li dan ifisser ukoll serħan il-moħħ għall-impjiegi tal-ħaddiema kollha.
Qal, “Aħna bħala General Workers’ Union sodisfatti bin-negozjar li għamel il-Gvern għax hija kontinwazzjoni tal-istabbilità tal-prezzijiet tal-enerġija li addotta l-Gvern, u naqblu magħha għax hawn qed nagħtu stabbilità lill-impjiegi u l-postijiet tax-xogħol.”
Jissekondah kien hemm il-Kap Eżekuttiv tal-Assoċjazzjoni ta’ min iħaddem, l-MEA, Joe Farrugia. Huwa qal li dan il-qbil mal-Unjoni Ewropea jfisser inqas tibdil u inċertezza għan-negozji u l-intrapriżi f’pajjiżna.
Qal, “Importanti, anke ma’ miżuri oħra li qed jieħu l-Gvern, li kemm jista’ jkun ikollok is-sigurtà tal-provvista u li jkollok l-inqas tfixkil għan-negozji, anke minħabba l-prezzijiet ukoll. Allura, il-fatt li ġibna din id-deroga, naħseb li huwa pass fid-direzzjoni t-tajba.”
Min-naħa tagħha, il-Kap Eżekuttiv tal-Kamra għan-Negozji Żgħar u Medji, Abigail Mamo, iddeskriviet il-ħidma ta’ Malta fil-Kunsill tal-Unjoni Ewropea bħala waħda ta’ suċċess.
Qalet, “Malta għamlet xi ħaġa ta’ suċċess; ġabet deroga importanti. Hija importanti ħafna għal pajjiżi żgħar bħal Malta, jiġifieri din ma kinitx xi ħaġa awtomatika, xi ħaġa li Malta kellha taħdem ħafna u kienet importanti għaliex, fejn pajjiżi oħra u fejn direzzjoni li tkun qed tieħu l-Ewropa biex inti tieħu minn sorsi differenti tal-enerġija, Malta ppreżentat il-każ tagħha li m’għandhiex ħafna mozzjonijiet bħal pajjiżi oħra. Allura, importanti li nkunu eżenti f’din id-deroga. Però, Malta ħadet commitment ukoll li taħdem iktar fuq ir-riżorsi rinnovabbli tal-enerġija.”
Il-Ministru responsabbli mill-Enerġija, Miriam Dalli, spjegat li din l-eżenzjoni hija kruċjali għal pajjiżna, speċjalment minħabba l-fatt li l-maġġoranza tal-enerġija ta’ pajjiżna hija ġġenerata mill-gass.
Qalet, “Sa mill-ewwel ġurnata, meta bdejna naraw x’qed jiġri internazzjonalment, tajna wiegħda lil dan il-poplu li se nkunu qiegħdin hemm biex nissalvagwardjaw u nipproteġu l-konsumaturi kollha, jiġifieri lill-familji, lin-negozji żgħar u medji f’pajjiżna, u l-industrija.”
