F’din is-sensiela, qegħdin niltaqgħu ma’ wħud mid-deputati Nazzjonalisti. Se nsiru nafu aħjar it-traġitt tagħhom fi ħdan il-PN, u r-rwol tagħhom matul is-snin, sal-ġurnata tal-lum. Illum se nsiru nafu aktar dwar CLAUDETTE BUTTIGIEG neè Pace, li hi l-favorita tal-fazzjoni estremista fil-Partit Nazzjonalista.
Id-Deputat Nazzjonalista Claudette Buttigieg
L-ewwel snin
Qabel ma daħlet fil-politika, Claudette Buttigieg kienet kantanta, li rrappreżentat lil pajjiżna fil-Eurovision Song Contest fis-sena 2000 bil-kanzunetta ‘Desire.’ Kienet ukoll xandara fuq il-PBS, in-NET, u anke l-ONE fost stazzjonijiet oħrajn, imbagħad inxteħtet fil-politika mal-Partit Nazzjonalista.
Il-magħżula ta’ Lawrence Gonzi
Lawrence Gonzi ġera wara Claudette Buttigieg biex tikkontesta l-elezzjoni ġenerali tal-2013 u din hekk għamlet.
Fis-17 ta’ Settembru tal-2012, Buttigieg ġiet approvata mill-Kumitat Eżekuttiv tal-PN biex tkun kandidata.
Dakinhar ġew approvati wkoll, bħala kandidati għall-elezzjoni ġenerali, Simon Busuttil, David Casa, Toni Bezzina u Marthese Portelli.
Portelli kienet eventalwament irriżenjat mill-Partit Nazzjonalista.
Simon Busuttil, wara tkaxkira li laqqat bħala Kap tal-PN fl-elezzjoni tal-2017, sparixxa lejn Brussell. Issa reġa’ ġie lura u reġa’ daħal b’mod attiv ħafna fil-PN u ma’ tar-Repubblika.
Claudette Buttigieg ikkontestat dik l-elezzjoni fuq Distrett numru 12, li jinkludi r-raħal tan-Naxxar, fejn toqgħod u ġiet eletta. Imbagħad reġgħet ġiet eletta fl-2017 u fl-2022.
Il-favorita ta’ Simon Busuttil
Meta Simon Busuttil kien Kap, Claudette kienet waħda mill-favoriti tiegħu. Busuttil kien magħruf kemm kien Kap dgħajjef kif ukoll li jimxi ħafna bil-grazzja, u Claudette kienet fil-good books ta’ Simon.
Fi żmien Busuttil, Buttigieg kienet il-kelliema tal-PN għas-saħħa, liema kariga xejn ma qatgħet figura tajba u dawk involuti fil-qasam tas-saħħa kienu ta’ sikwit jgħidu li lanqas kienet taf ‘x’laqatha.’ Imma Simon kien iġibha ħafna u dejjem ħareġ għonqu għal Claudette anke jekk kienet litteralment inkapaċi fil-qasam li tiegħu kienet kelliema.
Fi żmien Busuttil, Claudette kienet impjegata d-Dar Ċentrali, fid-Dipartiment tal-Bejgħ u Reklamar. Fiż-żmien li l-ħaddiema tal-PN bdew jintbagħtu d-dar bla paga, Buttigieg kellha fost l-ogħla pagi fid-Dar Ċentrali.
Fatt magħruf li Buttigieg qatt ma niżlet tajjeb mal-ħaddiema tad-Dar Ċentrali.
Gwerra kontra Delia
Meta Adrian Delia ħareġ għall-kariga ta’ Kap tal-PN, Claudette Buttigieg appoġġjat lil Alex Perici Calascione u meta dan inqala’ wara l-ewwel round ta’ dik l-elezzjoni, intefgħet b’ruħha u ġisimha wara Chris Said.
Meta Delia ġie elett Kap, Claudette ngħaqdet ma’ 16-il deputat ieħor, li d-deputat politikament fallut Jason Azzopardi, sejħilhom 17 Blue Heroes u ħadmet b’kemm kellha saħħa biex Delia jitqaċċat minn Kap.
Jirriżulta li s-17 Blue Heores kellhom anke chats fuq WhatsApp bejniethom u Buttigieg kienet attiva ferm fih bi kritika lejn kulma kien jagħmel Delia u dawk viċin tiegħu.
Għadhom f’moħħ kulħadd ix-xeni ta’ Buttigieg fil-karozza ma’ Chris Said dieħla l-Palazz ta’ Sant’Anton biex jgħidu lill-President George Vella li Adrian Delia ma kellux l-appoġġ tagħhom.
Il-President Vella ma kienx laqa’ t-talba tagħhom u Delia baqa’ Kap.
Claudette u sħabha fferoċjaw aktar sakemm fl-aħħar sabu lil Bernard Grech, avukat ta’ ftit li xejn suċċess, għajr għall-pariri li kien jagħti dwar ħitan u katusi u appoġġi fuq ir-Radju Nazzjonalista, u ħarġuh biex ineħħu lil Delia bih.
L-għan ta’ Claudette u sħabha l-Blue Heores intlaħaq u lil Delia bagħtuh id-dar.
Kburija li qaċċtet lil Delia
F’Jannar 2023, waqt intervista fuq ir-Radju tal-Knisja, mistoqsija jiddispjaċihiex li marret għand il-President sabiex jitqaċċat il-Kap Nazzjonalista Adrian Delia mit-tmexxija tal-Partit Nazzjonalista, Buttigieg qalet li ‘Le.’
Preżentatur – “Jiġifieri jiddispjaċik li għamilt hekk, li kont involuta?”
Claudette Buttigieg – “Le.”
Preżentatur – “Ħallast il-prezz imma?”
Claudette Buttigieg – “Hekk hu.”
Preżentatur – “Jiġifieri l-prezz tal-popolarità mhux the ultimate price.”
Claudette Buttigieg – “Dak il-mument ħassejt li għamilt the right thing. Jien ma tantx nieħu deċiżjonijiet f’ħajti li jiddispjaċini fuqhom.”
Mistoqsija għal darba oħra dwar dan, hija kompliet issostni li ma jiddispjaċihiex.
Preżentatur – “Din ma jiddispjaċikx jiġifieri?”
Claudette Buttigieg – “Le.”
Dak il-kumment ta’ Buttigieg ħoloq rabja enomri fost partitarji ta’ Delia li lil Buttigieg ma jġibuhiex.
Il-magħżula tal-fazzjoni estremista
B’Bernard Grech Kap, Claudette Buttigieg fetħet ġwejnħajha.
Illum hi parti intrinsika mill-fazzjoni estremista li tiddetta dak kollu li jseħħ fil-PN u li tmexxi lil Bernard Grech minn imnieħru.
Hu fatt magħruf li Claudette viċin ħafna, u hawn min fil-PN jgħid li ‘tilgħaq bil-kbir,’ tal-Kap de facto tal-PN Karol Aquilina, ta’ Jason Azzopardi u ta’ Simon Busuttil, fost oħrajn.
Claudette hi viċin ħafna tal-Għaqda Repubblika, li tista’ tgħid li titmexxa, għalkemm mhux b’mod uffiċjali, minn Robert Aquilina, in-nutar tal-Kurja tal-Arċisqof, u ħu d-deputat tal-fazzjoni estremista Karol Aquilina.
‘Il-Queen’
Diġà żvelajna kif lil Claudette Buttigieg isibuha bħala ‘l-Queen’ u dan għax għandha arja kbira fil-PN.
Tant hi favorita tal-fazzjoni estremista illi filwaqt li hi prassi li deputati Nazzjonalisti ma jitkellmux il-Ħadd filgħodu fid-distretti taghhom meta jkun hemm attività bil-kap Nazzjonalista, jidher li dawn ir-regoli ma japplikawx għal Claudette Buttigieg għax maghha saret eċċezzjoni, l-aktar riċenti din is-sena stess.
Kontra s-Sindku Nazzjonalista tan-Naxxar
Claudette Buttigieg Naxxarija. F’Jannar 2022, il-PN, jew aħjar il-fazzjoni estremista li tmexxih, riedet tieħu passi kontra s-Sindku Nazzjonalista Anne Marie Fenech Adami tant li Bernard Grech, permezz tas-Segretarju Ġenerali Michael Piccinino, talabha tirriżenja fuq allegat kunflitt ta’ interess dwar proġett fin-Naxxar. Iż-żmien ta raġun lil Anne Marie Grech. Iżda dakinhar, Buttigieg appoġġjat bis-sħiħ il-proċess ta’ dixxiplina fil-konfront tas-Sindku tan-Naxxar. Waqt konferenza tal-aħbarijiet, Claudette Buttigieg kienet qalet, “Għandna bħalissa wkoll is-Sindku tan-Naxxar Ann Marie Muscat Fenech Adami għaddejja minn proċess fi ħdan il-bord ta’ dixxiplina u allura jiena nħalli lil dan il-bord jagħmel xogħlu.”
Sieq ’l hemm u oħra ’l hawn
Fi żmien Simon Busuttil, meta l-PN kien qed jagħmel kruċjata kontra d-drittijiet ta’ persuni LGBTIQ+, Claudette Buttigieg kienet magħrufa li fuq dan is-suġġett tpoġġi sieq ’l hemm u sieq ’l hawn. Ma’ persuni LGBTIQ+ kienet titkellem b’kompassjoni iżda meta kienet tiġi għall-fatti, kienet tieħu l-linja politika Nazzjonalista li pruvat iċċaħħad lill-persuni LGBTIQ+ minn drittijiet fundamentali li tahom Gvern Laburista.
Claudette llum
Kif diġà għedna, illum Claudette Buttigieg iffukata biex iżżomm is-siġġu parlamentari. Ingarżata mal-fazzjoni estremista, titkellem b’mod estremist dwar il-Partit Laburista u l-Prim Ministru Robert Abela, persuni midħla tal-kurituri tad-Dar Ċentrali jgħidu li ‘tħossha’ u taf li għandha s-saħħa tal-fazzjoni estremista warajha u l-barka ta’ Bernard Grech – Kap politikament dgħajjef immexxi minn imnieħru minn deputati bħal Karol Aquilina u esponenti Nazzjonalisti bħalma huma Jason Azzopardi u Simon Busuttil.
