Taħt Gvern Laburista, jiġifieri mill-elfejn u tlettax lil hawn inħolqu sitta u sebgħin elf impjeg.
Dan intqal mill-Ministru għall-Ekonomija, Investiment u Negozji Żgħar Silvio Schembri fil-Parlament, waqt l-estimi finanzjarji ta’ dan il-Ministeru.
Huwa stqarr: “76,000, taf xi tfisser? Aqbad 15-il sena ta’ Gvern Nazzjonalista, l-aħħar 15-il sena, mhux ħames snin biss ta, tliet leġislaturi sħaħ. Aqbdu 15-il sena ta’ Gvern immexxi minnkom, għoddu x-xogħlijiet kollha li ħloqtu u xorta ma taqbżuhomx. Dik id-differenza, 15-il sena tagħkom, ma jaqbżux tmien snin ta’ Gvern Laburista.”
Il-Ministru Schembri qal kif bħalissa l-Gvern għaddej fuq xogħol ta’ titjib fiż-żoni industrijali madwar pajjiżna.
Qal kif dawn ix-xogħlijiet qed isiru, biex il-ħaddiema li jaħdmu f’dawn iż-żoni jaħdmu f’żoni aħjar.
Il-Ministru għall-Ekonomija qal kif dan qed isir mingħajr ma tintmess l-ebda art ġdida.
Il-Ministru Silvio Schembri qal kif se jkun qed jinbnew erba’ Life Sciences Park ġodda, b’investiment ta’ ftit iżjed minn mitt miljun ewro.
Fis-Central Business District jew iż-żona magħrufa bħala l-Imrieħel se jkun qed isir aktar titjib u aktar se jkunu installati erbatax-il charging station, apparti dawk li ħabbar il-Gvern il-ġimgħa li għaddiet.
Waqt din is-seduta tkellem ukoll id-Deputat Laburista Jonathan Attard, fejn semma kif pajjiżna għandu l-inqas rata ta’ qgħad fl-istorja.
Dr Attard qal kif dan il-Gvern jinvesti u jinċentiva l-bżulija: “U matul is-snin, Gvernijiet Laburisti, il-Partit Laburista mill-Gvern ħadem bla heda u investa kemm felaħ fil-ħaddiem u riżultat t’hekk qed nirreġistraw fost l-ogħla rati ta’ impjiegi u l-inqas rati ta’ qgħad, kemm fl-istorja u anke meta mqabbel ma’ pajjiżi oħra Ewropej.”
