Għal sena oħra konsekuttiva, l-atleta Miguel Mifsud qed jagħmel l-isfida li jiġri 100 mil. Din id-darba madwar it-trakka tal-Mediterranean College of Sport, f’Birkirkara b’risq Caritas Malta.
Diversi residenti tal-Caritas kienu preżenti biex jagħtuh is-sapport tagħhom f’dawn is-siegħat li ġejjin. Qabel ma’ beda l-ġirja ta’ 24 siegħa, Mifsud talab għal minuta ta’ silenzju biex ifakkru l-memorja ta’ Dun Victor Grech.
Ftit mumenti qabel ma bdiet l-isfida, ONE staqsa lill-atleta x’inhu l-messaġġ tiegħu lejn dawk li qed jagħtuh is-sapport kontinwu.
“Ovvjament qed intella’ din l-attività b’risq, mhux biss għall-isports iżda iktar milli hi ġirja, hija ġirja ta’ tama. Qegħdin hawnhekk biex inwasslu l-messaġġ lil dawk kollha li b’xi mod jew ieħor tilfu l-kredibilità fihom innifishom u jinsabu fid-dlam. Kbira kemm hi kbira l-problema, jew kemm hi kbira l-muntanja, jekk tiddedika ruħek ‘il quddiem tista’ tegħleb ostakli li għandek quddiemek.”
L-Atleta Miguel Mifsud
Diversi atleti u tfal ġrew l-ewwel ftit tal-ġirja ma’ Mifsud. Mal-ħin li ġej hu se jkun akkumpanjat minn atleti u nies oħra biex jagħtuh l-appoġġ meħtieġ waqt dawn l-24 siegħa, jiġifieri sal-ħdax ta’ filgħaxija tal-Ħadd.
