Fi ftit xhur, ir-residenti tal-Isptar San Vinċenz ser ikunu jistgħu jgawdu minn Dementia Garden b’investiment ta’ tlett kwarti ta’ miljun ewro.
Il-kunċett ta’ ġnien dementia-friendly huwa wieħed innovattiv u huwa l-ewwel tax-xorta tiegħu f’Malta.
Dan il-ġnien se jkun qed ikopri 3,000 metru kwadru u joffri spazju fejn persuni bid-dimensja jistgħu jqattgħu ħin ta’ rilassament.
Il-Ministru għall-Anzjanità Attiva Jo Ettiene Abela flimkien mal-Kap Eżekuttiv ta’ San Vinċenz de Paule, Dr. Josianne Cutajar żaru l-andament tax-xogħol li se jwassal għal dan il-ġnien importanti.
Hawn ġie spjegat kif il-pjan ta’ dan il-proġett huwa bbażat fuq il-bżonnijiet tan-nies li jbatu minn sintomi tad-dimensja.
Il-perit, Matthew Casha qal, “Huwa ġnien li huwa pjanat biex ikun kompletament aċċessibbli pereżempju li ma jkollux kantunieri fejn persuna jista’ jintilef. Huwa ppjanat b’materjali li jgħinu lin-nies ikunu jistgħu jinnavigaw fil-propju ġnien. Pereżempju jkollhom materjali b’ċertu kuluri biex ikunu jistgħu jiffolowjaw pathways u affarijiet hekk.”
Malli jitlesta dan il-ġnien, fil-fatt ser ikunu jistgħu jsiru attivitajiet differenti permezz ta’ sezzjonijiet ta’ gruppi u individwali u attivitajiet ta’ soċjalizzazzjoni fost oħrajn.
Ix-xogħlijiet jinkludu servizzi ta’ elettriku, ilma, funtani, għamara ġdida, pavimentar ġdid u lquħ ta’ ilma tax-xita ġodda. L-ilma ser jintuża għat-tisqija tal-pjanti, arbuxxelli u siġar.
Minn naħa tagħha l-Kap Eżekuttiv tal-Isptar San Vinċenz, Dr Josianne Cutajar sostniet lipermezz ta’ ġnien b’għajnuna minn entitajiet differenti issa l-anzjani ser ikunu jistgħu jgawdu minn spazju pubbliku.
ll-Ministru għall-Anzjannità Attiva Jo Ettiene Abela fl-indirizz tiegħu spjega li b’dan il-proġett li ser jitlesta’ fi ftit xhur se tkun twettqet miżura oħra tal-budget.
Huwa sostna wkoll kif dan il-proġett kien possibbli frott studju importanti li sar minn akkedemiċi fl-Università ta’ Malta.
Huwa qal, “Dan ħa jkun spazju li ġo fih il-persuni li jbatu bid-dimensja jistgħu jirrikrejaw ruħhom flimkien mal-għeżież u mal-carers tagħhom. Huwa spazju li huwa frott ta’ riċerka minn akkademiċi fl-Università fil-fakultà tal-Built Environment. Aħna proġetti ta’ dawn it-tip li huma bbażati fuq riċerka soda rridu nżiduhom f’pajjiżna.”
Minn naħa tagħha, Infrastructure Malta qalet li se tkun ta’ għajnuna f’dan il-proġett. Hi ser tkun qegħda tgħin b’asfalt ġdid u kurduni tal-bankini, kif ukoll tqattieħ għal sistemi akbar tal-lquħ tal-ilma.
Il-ġnien ser joffri ambjent aħjar lir-residenti bid-dimensja. Barra minn hekk dan il-ġnien se jkun ukoll miftuħ għal pubbliku.
