Għaddejjin ġmielhom ix-xogħolijiet li qegħdin isiru fix-Shooting Range f’Ta’ Kandja liema post ser jospita għall-ewwel darba it-tazza tad-dinja tal-isparar li ser issir f’Ġunju li ġej u li għaliha ser jattendu 300 tiratur bil-familji tagħhom li b’kollox ser jaslu f’Malta kontinġent ta’ 700 ruħ.
Dawn ix-xogħolijiet ser isarfu f’wegħda elettorali oħra mwettqa minn dan il-Gvern li ttrasforma 26 tomna ta’ art li kienet tintuża sabiex jintremew il-karozzi ġo fiha, illum il-ġurnata din iż-żona qed tinbidel f’kumpless sportiv fejn ser jiġi pprattikat l-isport tal-isparar u fl-istess waqt jospitaw kompetizzjonijiet ta’ fama mondjali.
Waqt żjara fuq il-post, il-Perit Claude Mallia spjega li qed issir ħidma sabiex filwaqt illi jiġu r-rispettati r-regolamenti dwar is-saħħa u s-sigurta ser ikun sisalvagwardjat l-ambjent. Dan hekk kif l-ilma tax-xita ser jgħaddi minn ġot turf u jmur għall-wiċċ tal-ilma taħt l-art jew inkella jiġi ddevjat f’barriera li qegħda tintuża bħala riserva tal-ilma. Il-Perit semma li f’din is-shooting range qed tintuża xibka li ntużat f’Londra sabiex minnha nfisha tilħaq l-iskartoċċi biċ-ċomb li jifdal- huwa saħaq li kwalunke biċċiet li jista jifdal u li jaqa fit-turf, hemm makkinarju għal tal-apposta li jiġbru.
Dawn ix-xogħolijiet li qegħdin isiru f’din is-shooting range qed isarfu f’tama għal dawk it-tiraturi kif ukoll id-dilettanti kollha tal-isparar li ilhom bix-xewqa li jaraw kumpless ta’ din ix-xorta f’Malta. Dan hekk kif fil-passat taħt Gvern Nazzjonalista, pajjiżna kellu jirrifjuta l-istedina sabiex jospita t-tazza tad-dinja tal-isparar darbtejn minħabba n-nuqqas ta’ faċilitajiet fejn jospitaw dak kollu li jġib miegħu dan l-isport fosthom art kif ukoll tagħmir għal tal-apposta.
Ma’ ONE NEWS, William Chetcuti esprima s-sodisfazzjon li sa fl-aħħar, il-ħolma ta’ ħafna tiraturi kif ukoll dawk dilettanti saritilhom realta:
Qatt ma stennejt li ser insib dan ir-range hekk..rajtu issa saru mirakli f’xhur tiġi ssib dan il-kobor ta’ proġett u kollox xogħol tajjeb ħafna. Ħolma li wieħed kien jaħseb bħala tiratur, li jkollna dan ir-range speċjalment ġo pajjiżna.
Is-Segretarju Parlamentari għall-Isport Clifton Grima semma kif dan għadu biss l-ewwel fażi ta’ dan il-proġett li sar b’investiment ta’ 10 miljun ewro; dan hekk kif eventwalment ser ikun hawn tliet ranges li jistgħu jintużaw ukoll għall-compact shooting.
