18.39: Milqugħa biċ-ċapċip ta’ dawk li nġabru fil-port, Michelle Muscat għelbet l-elementi u għamlitha sal-aħħar. Tgħannieqa kbira mit-tfal tagħha u żewġha. Viżibilment sodisfatta li għamlitha sal-aħħar.
18.28: Michelle fadlilha inqas minn 300 metru biex tasal fil-punt tal-wasla. Il-Prim Ministru jinsab fuq il-post bl-entużjażmu jkompli jiżdied. Etoile and Solei, ukoll qed jistennew lil ommhom tlesti l-isfida tagħhom.
18.11: Ftit ftit bdew jaslu n-nies biex jagħtu merħba lil Michelle tasal fil-Port il-Kbir. Fuq il-post mistenni jkun hemm il-Prim Ministru Joseph Muscat.
17.05: Michelle Muscat riesqa lejn l-aħħar tal-għawma tagħha, dan anke jekk il-baħar huwa wieħed imqalleb bil-mewġ huwa ta’ sfida mhux żgħira. Tant li filwaqt li l-protagonista għadha għaddejja, segwaċi li kienu fuq dgħajjes fil-qrib niżlu l-art. Fosthom ġurnalisti tant li minn ħamsa fuq dgħajsa maħsuba għall-ġurnalisti baqa’ biss tnejn.
16.24: Ftit tal-ħin, Michelle qabżet iż-żona ta’ Barkat.
Is-Sinjura Muscat diġà għamlet sfida simili s-sena l-oħra bejn il-fliegu ta’ Malta u Għawdex għal għan nobbli, iżda din is-sena l-sfida hija iżjed diffiċli hekk kif id-distanza hija kważi d-doppju. Huwa stmat li tlesti l-għawma f’temp ta’ tliet sigħat.
Aktar qabel: Kollox jinsab lest biex mart il-Prim Ministru, Michelle Muscat, tibda bl-isfida tagħha – dik li tgħum minn Wied il-Għajn għall-Port il-Kbir. Sfida ikbar mis-sena li għaddiet għaliex il-baħar f’dawn l-inħawi fih aktar kurrenti u huwa baħar miftuħ.
Ilbieraħ it-temp xejn ma kien favorevoli fil-gżejjer Maltin, b’riħ, baħar imqalleb u maltemp iżda illum jidher li t-temp se jkun aktar favorevoli, skont l-uffiċju meterjoloġiku.
