L-eks Segretarju Parlamentari Michael Falzon talab lill-Ispeaker isejjaħ laqgħa bejnu u l-Awditur Ġenerali ħalli mhux biss jiddiskutu r-rapport li l-Uffiċċju tal-Awditur għamel fil-kwistjoni tal-proprjetà ta’ Triq Żekka iżda anke ħalli l-Isġeaker ikun jaf kemm għad hemm investigazzjonijiet pendenti u jekk ir-rapporti dwar dawn qattx se jaraw id-dawl.
Waqt l-aġġornament, b’ton aġitat, Falzon ikkritika bl-aħrax ċerti ħaddiema li jaħdmu fl-Uffiċċju tal-Awditur Ġenerali u xliehom b’partiġjaniżmu politiku.
Semma b’isimhom lil ċerti individwi, fosthom Keith Mercieca, Antoine Calleja, Josephine Vella u t-tifla tal-eks kap taċ-ċivil, Dr Godwin Grima. Falzon iddikjara li dawn mhux talli mhux posthom f’dan l-uffiċċju iżda anqas biss għandhom jaħdmu mal-Gvern.
Qal li Antoine Calleja, li kien jaħdem fis-Segretarjat tal-eks Ministru għall-Artijiet Jason Azzopardi saħansitra siefer miegħu biex marru jaraw il-football. Issa dan Calleja jrid jinvestiga l-aġir tal-eks ministru.
Falzon qal lil Keith Mercieca hu perċimes tal-partiġjaniżmu politiku fl-uffiċċju tal-Awditur Ġenerali. Keith Mercieca li flimkien ma’ Josephine Vella, il-mara ta’ kandidat Nazzjonalista, ftaħru li wara li ħareġ ir-rapport dwar privatizzazzjoni, qalu li se jiftħu x-xampanja hekk kif se jħammġu lill-Ministru Chris Cardona. Huwa talab lill-Ispeaker jistaqsihom x’xampanja fetħu meta ħareġ ir-rapport dwar Triq Zekka.
Michael Falzon ilmenta li r-rapporti tal-Awditur mhumiex iffirmati, bħal ittri anonimi, minkejja li jkissru l-karriera politika ta’ dak li jkun. Meta tistaqsi dwar dan jgħidulek għax mhix il-prassi.
Huwa qal li minkejja li r-raport tal-Awditur lilu ħammġu, meta mar quddiem il-Kumitat tal-Kontijiet Pubbliċi ġie eżonorat minn kull akkuża u l-unika ħaġa li għamnel kien li ffirma. Minkejja li talab lill- Awditur biex joħorġu addenda għar-rapport, qallu li din mhix il-prassi.
Falzon appella lill-Awditur Ġenerali preżenti Charles Deguara għal aktar trasparenza.
Staqsa min jagħmel l-aġenda ta’ x’jiġi investigat fl-uffiċċju tal-Awditur Ġenerali?
Kif jinvestigaw każ u ieħor ma jinvestigawhx? Min se jinvestiga l-iskandlu tal-Fekruna? Min kien isiefer mal-Ministru li kien involut? Min se jinvestiga l-każ tal-HSBC li għal kirja ta’ ftit snin tħallsu l-miljuni?
Kien hawnhekk li talab li l-Ispeaker isejjaħ laqgħa. Min naħa tiegħu l-Ispeaker qallu li se jinvestiga dak kollu li qal Falzon biex jara jekk hemmx ksur tal-proċedura u tal-Kostituzzjoni.
