Fil-każin Nazzjonalista tal-Mellieħa, Bernard Grech ried jibgħat lil messaġġ għal dawk li fil-partit stess fost oħrajn, qed iqajmu mistoqsijiet dwar it-tmexxija tiegħu ftit aktar minn tliet xhur ’il bogħod mill-elezzjonijiet tal-Parlament Ewropew u tal-Kunsilli Lokali.
Bernard Grech qal li għalkemm hu qed jisma’, saħaq ċar li hu ma għandu bżonn lil ħadd jurih kif imexxi l-Oppożizzjoni Nazzjonalista.
“Jiena m’għandi għalfejn lil ħadd jgħidli kif l-Oppożizzjoni tista’ tkun aħjar.”
Bernard Grech – Kap tal-PN
Dikjarazzjoni li tibgħat messaġġ lil bosta fil-fazzjonijiet li hemm fil-partit tiegħu fl-istess jum li l-gazzetti tal-Ħadd kienu wkoll iddominati bil-manuvri u l-mistoqsijiet li għaddejjin fuq it-tmexxija f’tal-Pietà.
Fil-fatt il-gazzetta ‘Illum’ fil-faċċata tagħha rrapportat kif hemm kemm Alex Borg u Darren Carabott lesti biex jieħdu post Grech, b’Borg għandu warajh lil Adrian Delia u Darren Carabott meqjus bħala il-filjozz ta’ Claudio Grech li warajh hemm Austin Gatt.
Il-gazzetta t-Torċa nnutat ukoll kif in-nies ta’ Bernard Grech qed jagħmlu minn kollox biex Metsola tinżamm ’il bogħod u tibqa’ Brussell f’kariga oħra wara li fallielha t-tragward li tkun hi li ttellaq f’isem tal-Partit Popolari Ewropew biex issir il-President tal-Kummissjoni Ewropea flok Ursula Von der Leyen.
Imbagħad fl-istess jum kellek l-eks Ministru Nazzjonalista Michael Falzon, li fil-Maltatoday kiteb dwar it-tmexxija dgħajfa ta’ Grech.
Intant fil-każin Nazzjonalista Bernard Grech issokta bl-attakk tiegħu fuq l-investiment fin-nies fil-Gvern.
Daqqa jattakka l-inizjattivi ta’ stabbiltà fil-prezzijiet tal-ikel u fl-enerġija u llum kompla jattakka l-għajnuniet billi qal li bihom jinxtraw l-elezzjonijiet.
“Dan il-Gvern illi jixtri u jagħmel minn kollox biex jixtri u jaħtaf anki il-voti.”
Bernard Grech – Kap tal-PN
Ma naqas li Bernard Grech juża narattiva ankrata fil-passat u qal li kienu Gvernijiet Nazzjonalisti li poġġew lil Malta ’l quddiem.
“Kien hemm ċiklu ta’ ħamsa u għoxrin sena ta’ Gvern Nazzjonalista li rebaħ l-elezzjonijiet b’maġġoranza u ġab lil Malta ’il quddiem.”
Bernard Grech – Kap tal-PN
