Il-President tal-MFA, Bjorn Vassallo, flimkien mas-Segretarju Ġenerali Dr Maria Azzopardi u mat-Teżorier tal-Assoċjazzjoni Ivan Mizzi, kienu preżenti f’Asuncion ġewwa l-Paragwaj, għall-75 Kungress tal-FIFA li nżamm il-Ħamis, 15 ta’ Mejju 2025.
Il-Kungress tmexxa mill-President tal-FIFA, Gianni Infantino, bil-211-il pajjiż membru ltaqgħu fl-Amerika t’Isfel mhux biss għall-Kungress iżda għal numru ta’ attivitajiet li kienu organizatti mill-istess FIFA u kif ukoll mill-Conmebol u l-uffiċju tal-President tal-Paragway. Il-Kungress inżamm fil-Kwartieri Ġenerali tal-istess Conmebol fil-kumpless amministrattiv u sportiv li għandhom ġewwa Asuncion.
L-aġenda tal-laqgħa kienet tinkludi r-rapport tal-attivitajiet tal-FIFA għa-sena 2024 u kif ukoll ir-rapport finanzjarju għas-sena preċedenti u r-reviżjoni tal-baġit finanzjarju għall-2025, flimkien ma’ numru ta’ rapporti oħra dwar il-governanza u l-konformita’.
Fid-diskors tiegħu lill-membri l-President tal-FIFA, Gianni Infantino tkellem fuq numru ta’ suġġetti fosthom fuq ir-razziżmu u l-implimentazzjoni tal-kodiċi l-ġodda dwar dan u l-importanza li l-futbol ikompli jkun magħqud biex jikkonfronta l-preġudizzju, d-diskriminazzjoni u l-antagoniżmu speċjalment fi gruppi ta’ minoranza u oħrajn emarġinati. Il-President tkellem ukoll dwar l-introjti tal-FIFA, ir-relazzjonijiet fil-politika u fl-ekonomija u l-programm ta’ żvilupp sportiv FIFA Forward. Waqt id-diskors tiegħu semma wkoll il-kompetizzjoni tal-Club World Cup fejn saħaq li din hija l-ewwel Tazza tad-Dinja għall-Klabbs u li permezz tal-kuntratti kummerċjali li l-FIFA rnexxielha tiffirmha, l-partiti kollha se jkunu mxandra u jistgħu jkunu segwiti bla ħlas mill-partitarji fid-dinja kollha. Qal ukoll li l-flejjes kollha ġġenerati minn din il-kompetizzjoni se jmorru lura fil-futbol.
Waqt il-laqgħa saru numru ta’ interventi fosthom mill-Viċi President tal-FIFA u President tal-Conmebol, Alejandro Dominguez, li ta l-merbħa tiegħu lid-delegati kollha minn madwar id-dinja fid-dar tal-futbol fl-Amerika t’Isfel u saħaq li l-futbol huwa tan-nies u li kien qiegħed jistieden lil kulħadd fl-Amerika t’Isfel meta ssir it-Tazza tad-Dinja fis-sena 2030, propju l-avveniment li se jimmarka l-Anniversarju taċ-Ċentinarju tat-Tazza tad-Dinja, 100 sena minn meta saret l-ewwel waħda fl-1930 ġewwa l-Urugwaj.
Finalment matul il-jiem tagħhom f’Asuncion il-President tal-MFA, Bjorn Vassallo u d-delegazzjoni Maltija, żammew diversi laqgħat bilaterali, kemm mal-amministrazzjoni tal-FIFA, ma’ uffiċjali tal-UEFA u kif ukoll ma’ numru ta’ pajjiżi minn konfederazzjonijiet differenti. Il-laqgħat kienu jikkonsistu f’diskussjonijiet dwar it-teknoloġija fil-futbol, oħrajn dwar ir-regolamentazzjoni u r-regolatorju sportiv u laqgħat oħra dwar l-għaqda fid-dinja u l-bżonn għall-paċi.
